三防DEFY浸佢唔壞！

未見過一部手機，會有咁多人想浸死佢。唔信？上YouTube打「Motorola DEFY」做Keyword有大把片睇。小記膽粗粗，一接到機即做「插水」測試，結果插足半粒鐘手機依然正常運作。再翻查資料，原來佢還具備防塵、防刮功能，即係水、塵、刀都傷佢唔到，智能手機中最Tough係佢！

防水！售價 $3,280

插沙插水都冇事

提起三防手機，好多人即刻聯想到軍事用途，但其實經常去旅行的用家，三防機都大派用場。呢部DEFY叫得自己做「三防」，機身自然有保護設計，全機接合位均有螺絲扣緊，接駁介面又有防水膠邊保護，加上電池蓋附有安全鎖；就算小記用水又沖又浸佢，抹一抹就能繼續使用，認真堅！DEFY屏幕還加入一層強化玻璃，令它兼備防塵防刮功能，插沙都冇事，遲啲去滑沙都可以帶埋佢！

人性化操作介面

以往嘅三防手機保護性強，但內涵超低能。DEFY相反，徹頭徹尾係一部智能手機，行Android 2.1系統，並搭載800MHz處理器及512MB RAM，基本上操作順滑無比。介面方面，一如過往冇MOTOBlur，但公版設計都有不少優化，例如相片、日曆、便利貼等Moto Widgets小工具，位置及大細能隨意改變。另外7版首頁除可用手指撥動切換，屏幕底還備有頁數索引，掂一掂就能跳到指定頁面，比公版Android更人性化。

防沙！	放大圖片	USB、microSD及3.5mm耳筒介面都有防水膠邊保護。
接合位有螺絲扣實，保證水滴傷唔到手機內臟。	電池蓋設有安全鎖，唔解鎖的話，點撬都唔開。	DEFY內置埋1,540mAh超大容積電池，夠用9.9日勁長氣。
由即日起預訂DEFY，可免費獲贈HS690藍芽耳機。	500萬像素鏡頭配LED補光燈，係Android機標準配置。

取景即睇特效

DEFY還加入了一些原生Android沒有的功能，例如3G Hotspot及Flash Lite等，前者將手機變成Router分享網絡；後者則能播放Flash動畫，上網觀感似足電腦。此外，過往Android影相都為人詬病，DEFY雖然鏡頭像素只有500萬唔算高，但拍攝介面就大幅改良，調校情景模式及白平衡效果能即時預覽，而黑白、負片及懷舊等Lomo特效亦能直接加入，毋須做後期加工咁麻煩！