Motion Sports闖雪山滑到腳痹

九宮格射波

運動配搭體感其實都幾夾，好似Wii一早就有隻《Wii Sports》，PS Move都有隻玩另類運動嘅《Sport Champions》 ；今次Ubisoft為Kinect平台開發的《Motion Sports》，就同樣搜羅咗港人較少玩嘅運動項目，以後唔使特登飛去外國玩啦！

遊戲收錄咗6大類別運動，最熟悉應該算是足球，但唔似Microsoft自家《Kinect Sports》咁玩交波同射波，《Motion Sports》除咗有12碼射外，仲加入「九宮格」式計分射波，甚至可以林源三上身扮龍門飛撲，玩得夠真實。

落山滑雪最攰

想玩得再激啲？大可嘗試美式足球扮四分衞，從後場大力掟波上前場畀隊友達陣，仲備有特別關卡直情鏟入對方後場達陣取分，對於未玩過美式足球嘅玩家都幾有新鮮感。至於拳擊運動唔使多講，可做到直拳、勾拳、閃避等基本動作，不過在臨KO對手前，畫面會提示你連環出拳，玩落都幾攰。但講到玩得最攰要數滑雪項目，尤其係落山賽，一嚟要長時間屈膝加速，另一方面又要閃身穿過指定圍杆搶分，玩完肯定成身汗。

偷拍運動全相

至於另外兩款體感遊戲好唔好玩就見仁見智，如馬術比賽要控制馬匹步韻及跳欄。相信經歷奧運同亞運後，大家對賽制都有啲認識，控制馬匹轉向其實好講功夫，小記自問做唔到。另外難得一試嘅滑翔飛行，好考玩家嘅平衡力。

在這6大遊戲項目，總共收錄了40個不同關卡，如果表現得好的話，仲可以擺靚Pose影相做雜誌及報章封面，畀你Share給朋友威吓；不過遊戲好多時都會偷影你打機周身郁嘅全相，貪靚嘅玩家做緊運動時記住笑啦！

類型：運動

開發：Ubisoft Milan

平台：Xbox 360 Kinect

推出日期：已推出

售價：$299

查詢電話：2359 7998

同場加映《新體感腦力鍛煉》啱一家大細

在NDS賣到開巷嘅《腦力鍛煉》最近亦出咗Kinect版，玩法唔使太用力，只係將原本用手篤芒答題目變成體感模式，例如要做出畫面顯示的時間，就要一隻手做時針、一隻手做分針，扮時鐘擺Pose。當中還收錄「計算」、「反射」、「判斷」、「記憶」及「動作」五大範疇，最貼心係香港行貨會有埋中文版，小朋友都啱玩！

撰文：布偉倫