IdeaCentre B310手Fing Fing打乒乓

交叉盒Kinect上星期首賣，全城搶到斷晒貨，唔使手掣玩體感的確幾盞鬼，但如果你唔係機迷，又想用部電腦試吓體感樂趣，不妨考慮Lenovo新出嘅IdeaCentre B310。21.5吋輕觸式屏幕畀你可以學街機咁篤芒外，仲可利用前置鏡頭玩埋體感遊戲，Fing手Fing腳打乒乓球，爽到暈！

體感FunZone似Kinect

近期遊戲界最Hit一定要數Kinect，其實佢嘅原理係用鏡頭和感應器捕捉大家動作。B310索性有樣學樣，透過前置鏡頭畀你玩體感遊戲，就以預載FunZone內的《Super Ping Pong》乒乓球為例，各位只需用手掌當球拍，左揪右揪就搞掂，玩法簡單易上手，連Model都玩到唔捨得走！

但大家要留意，體感遊戲啟動後，鏡頭會先感應玩家同鏡頭距離，換言之玩家需預留一定空間，玩之前記得執吓屋喇！此外，FunZone內得4款遊戲，而且不支援「單撈」新Game，耐玩性較低。

利用前置鏡頭玩體感，雖然靈敏度冇Kinect咁高，但玩法夠特別。

試玩區
入到《FunZone》就要用體感，連揀遊戲都要用手箭嘴。

試玩區
試玩《Music Star》音樂夠勁之餘節奏都好快，考你反應！

篤芒遊戲拍拍機

除咗大賣體感遊戲外，B310仲有另一殺着「觸控遊戲」。21.5吋LED支援多點觸控之餘，仲內置6隻篤芒遊戲畀你慢慢玩，當中最好玩要數《Music Star》，玩法同街機嘅「拍拍機」差唔多，只要隨着音樂起勢三色弦線，節奏得愈準就愈高分，極考大家嘅反應，以後唔使落機舖都可以過手癮啦！

一體機身高效能

All-in-One電腦最大賣點就係慳位，就以B310一體機為例，外形同個21.5吋芒差唔多，但整合Core i5處理器、4GB記憶體及ATI HD5450獨立顯示卡，用嚟打機睇片確一流。超薄機身更有齊DVD燒碟機、喇叭、讀卡器及TV Tuner等配置，配埋無線滑鼠加鍵盤，基本上用家一買即用唔使煩。B310另有多款實用軟件，好似《Photo Studio Paint》電子繪畫板，介面既得意又簡單，最啱媽咪陪小朋友一齊畫畫考創意。