年尾特別多日本電影殺到，當中最注目要數由動畫改編、搵來型男木村擔正嘅真人電影《宇宙戰艦大和號》。如果大家想回顧呢套風靡日本40年嘅經典，唔使煲晒成套卡通咁誇張，依家可以成艘「戰艦」買返屋企，識着燈又識發聲，仲有埋歌仔聽添，Fans一定超感動！
Bandai食住電影個勢推出「宇宙戰艦大和號」超合金，全長達425mm，淺灰色艦身夾鮮紅色艦底，單睇外形十足動畫咁原汁原味。有齊艦橋前後3門主炮、2門副炮及兩旁十多門機關炮，統統可以自由轉動，部分主要炮管更可以上下擺動，相當精細！最吸引是船艙出擊閘位全部能活動開合，艦尾戰機彈射器仲可以放置飛機，跟埋8架戰機隨時候命，重現作戰場面，正！
大和號模型見過唔少，但今次合金製成品比之前任何一隻都教人感動，全因新作除了識得發光發聲，仲可以遙控唱歌仔！Bandai特別將紅外線Remote加裝在戰艦台座上，玩家只需一按便可控制戰艦發聲和發光，例如大和號嘅絕招波動炮，可作2段聲效及3色LED變換，艦尾引擎仲識發紅光，加埋「轟轟」聲同卡通一模一樣，夠晒逼真！最感動莫過於戰艦收錄4首大和號卡通音樂，單係主題曲都播成分鐘，邊玩邊聽，夫復何求！
由木村拓哉領銜主演嘅真人電影《宇宙戰艦大和號》將於今年12月在日本上映，當中大和號用CG製成。故事講述外星人用輻射能「行星炸彈」侵襲地球。地球防衞軍飛行員古代進（木村飾）在探索任務時，意外發現一幅戰艦設計圖，仲得悉外星有一種消除輻射裝置，於是政府製造大和號，並派古代進一眾人出發，展開拯救地球之旅。
網址：http://www.yamato-movie.net
撰文：廖俊斌
查詢電話：2433 1828