Hot Toys 10周年出賣朋友
Action Figure，以往幾乎等於玩具的同義詞，但隨着一眾技術高超的韓籍頭雕師參與其中，近年水準已達蠟像級數，更成為不少Kidult珍藏品之一。而數當中最著名的廠商，Hot Toys必定榜上有名，適逢10周年誌慶，相關紀念活動排住隊嚟，頭炮是東京巡迴展的會場限定Figure「朋友」，由頭雕到配件都忠於漫畫原著，飲《20世紀少年》奶水大的粉絲，又豈能錯過﹖
漫畫版造型
《20世紀少年》係日本著名漫畫家浦澤直樹嘅長篇巨著，由1999年連載到2006年，很多人由主角細細個，睇到「朋友」死完一個又一個，情意結早深深種下。因此即使其後被拍成電影三部曲，但講經典，還是漫畫版優勝。
今次Hot Toys亦特別選用漫畫版的「朋友」作藍本，深灰色西裝採用闊膊設計，白色頭巾印上「友民黨」標誌，未玩已叫Fans腎上腺素飆升；而最正係驟眼看激似真布，但原來只係在啤膠面塗上布藝質料，仿真度高成咁，真係要向造型師JC. Hong寫個「服」字。
1:6迷你預言書
原著中「朋友」唔係包頭巾就係戴面具，身份一直係個謎，這方面Figure就直接得多，隨盒附送服部哲也頭雕一個，唔使估都知佢係「朋友」真身。頭雕則出自林浩己手筆，此君最擅長雕製卡通人物，經他操刀後，服部猶如從畫紙跳到現實一樣。
為了呈現「朋友」多個分身，玩家除可為服部戴上超人及忍者小靈精兩個面具外，更可換上「朋友樂園」出現過的蛋頭；數數手指，單是面相就有5款，有排玩！另外配件要特別一讚，送死光槍、遙控器係意料中事，意想不到係兩本預言之書和微縮版漫畫都以1:6比例呈現，製作如此精美，令人期望「健次一派」會陸續登場！
同場加映︰蝙蝠孖寶拍住上
除了「朋友」，10周年巡迴展的限量版還包括蝙蝠孖寶。它們將以一對發售，分別是《俠影之謎》出現過的奸角稻草人，以及中了毒氣後幻想出來的邪惡版蝙蝠俠。兩者均由本地生化造型師Joseph Tsang設計，蝙蝠俠主要在原版上加入舊化效果，並重雕面相，驚喜不大；反而稻草人係全新製作，頭部塗上仿麻布質料，而身上的瘋人院衫更可脫下以露出筆挺西裝。惟留意兩者均沒有任何配件，亦沒附送演員頭雕，未算完美。
撰文︰陳志滔
攝影︰郭凱敏
查詢電話︰2388 4677