今個禮拜Kinect即將上場，對應新Game特別多，當中主打就有這款Kinect版「Wii Fit」《Your Shape Fitness Evolved》。多得Kinect嘅全體感玩法，新作變得更加聰明，毋須平衡板等特別器材都可以玩到各種健身運動，仲收錄多款好玩兼消脂的迷你遊戲，日日玩半個鐘，消耗卡路里Keep Fit實有效！
遊戲入面收錄咗男、女星級教練Michael George及Michelle Bridges教你健身，喺多款鍛煉遊戲中，會陪你一齊玩及從旁指導，亦針對性為玩家設計健身課程，只要按遊戲提示去做，收身效果便更易達到。當系統感應出新玩家嘅時候，會自動檢測玩家的手腳長度同關節位置，玩家只需輸入個人體重同年齡，遊戲就會幫大家計算出運動所消耗的卡路里，記錄每日運動量同Keep Fit成績。
《Your Shape Fitness Evolved》設計都幾革命性，只要換套做Gym衫就可隨時在屋企玩健身，亦係Kinect今年在美國E3遊戲展時台上示範的大作。大家可能會覺得佢抄《Wii Fit》，其實Wii主要測量體力同平衡力，但《Your Shape Fitness Evolved》卻進一步感應玩家的關節和動作，去判斷玩家健身姿勢是否正確，似足有個專業健身教練企響你身邊一樣。
《Your Shape Fitness Evolved》着重專業之餘，亦加入好多有趣元素，例如玩家在遊戲的投射影像，會因應遊戲時間的長短和表現，由最初單色升級為油彩、水彩等特別效果，愈玩愈靚。
如果覺得淨係做Gym唔夠Fun，遊戲另備有多款有趣的帶氧迷你遊戲，當中有擊碎畫面上磚塊的Virtual Smash、跳虛擬呼拉圈的Loop-A-Hoop、慢跑的Light Race同考平衡力收Bye Bye肉的Stack'em Up。試玩時Model話最鍾意玩呼拉圈收腰；小記就鍾意玩Stack'em Up，看似唔使太大力，但其實要Hold住對手，練二頭肌同三頭肌都幾有用；長者玩家還可以耍太極，大人細路都啱玩。
類型：運動
開發：Ubisoft
平台：Kinect for Xbox 360
推出日期：11月18日
售價：$299
體感打交Game可能大家都玩過，但可以好似Kinect新Game《Fighters Uncaged》打得咁爽就真係冇一套做得到。遊戲除咗支援拳擊、防禦等基本招式外，仲可以出到批月爭、膝撞、Side Kick甚至Back Kick等70種武術招式，不過想使出Back Kick又唔使真係有武術底，玩家只需對住電視將其中一隻腳向後拉畫半圓即可出招，好易上手！
撰文 ：布偉倫
攝影 ：方偉堅
模特兒 ：Paris（Pure Models）
查詢電話 ：2418 8896