李美鳳靚太唔易做
有「電眼美人」之稱的李美鳳，過着令人羨慕的婚姻生活，雖貴為靚太，電眼從未失效，且眉精眼企。李美鳳說女人要知情識趣，無論對子女或丈夫，也要開放變通。教女擇偶如購物，以柔制剛寫信冧老公，招數多多的同時又要自我增值，這位靚太實不易當。
八十年代要數大美人，有「電眼美人」之稱的李美鳳當然上榜，下嫁台灣富商鄭翔中後，脫離日夜顛倒的水銀燈生活回歸平淡，家庭是她另一番事業。
「我好幸運同感恩，唔敢話唔快樂。由選港姐開始，我冇乜talent就紅咗，好popular又拍好多戲。坦白講，讀大學讀business，連睇場戲嘅時間都冇，好少接觸art。雖然好想有部好自豪嘅代表作，但我已經錯過咗呢個機會，有好劇本時，我唔識做，一味得個靚字，未拍到好突出嘅作品就結婚。但我覺得唔緊要，做housewife都可以當係career。有時睇到好正嘅戲，真係會恨到流晒口水，但真係唔會再拍戲。」
當成功的靚太，修身齊家治國平天下的道理也管用，性格屬實幹型的李美鳳，即使忙於照顧家庭，也身體力行擴闊眼界，如早年搞珠寶首飾生意，「雖然我係讀business，但原來係唔喜歡做，求人買嘢覺得好辛苦，加上當時經濟唔好，有啲錢又收唔番。但唔緊要，試咗又可以學多啲嘢，多個經驗！」
要識睇眉頭眼額
閒不下來的性格，即使照顧子女期間，憑觀察也學到新東西。「個女參加泳隊，我喺池邊做volunteer，真係熱到黐線，但睇睇吓又學識游水，哈哈！聽住教練點教，返屋企又試吓就識。依家日日都游，冬天都係，唔游唔舒服。」
身體力行「修身」外，同時要靠一雙懂看眉頭眼額的電眼「齊家」。「記住做女人EQ好緊要，思想要獨立，唔好將快樂建築喺老公仔女上，會令佢哋抖唔到氣。一段婚姻，有冇仔女都好，愈耐一定愈冇火花，但要知情識趣。老公因為工作心情唔好，唔好煩佢追問咩事，我會避開，等佢心情靚番先同佢傾偈。以前我會寫信畀佢，因為佢係包拗頸，好似debate咁，有佢講冇我講，佢反應好快，明明係灰都拗到係黑，我真係冇氣！寫信最好，佢冇得同封信講嘢，焗住要睇，呢幾年我好少寫信，因為佢耳仔開咗，哈！」
訓練子女自主權
「老公始終以事業為先，但都算係廿四孝老公，逢周末都會陪我哋，雖然佢心情好會對仔女溫柔，心情唔好會惡，但我教佢點教一對仔女。仔女踏入teenage階段，要用另一個方法同佢哋溝通，否則就會有隔膜，但我點都會放老公喺威嚴嘅位置。」
雖是龍鳳胎，但同一個管教方法，卻生不同效果，這是令李美鳳感有趣的地方。「我訓練子女有自主權，畀佢哋知道問題係一世都會有，要識得理性分析同解決。大女嘅成績由sports到academic，都係A+，佢對自己好有要求，我亦唔會畀壓力。囝囝成績未及家姐，我會叫佢諗吓自己目標係乜，例如佢考得唔好得C，我只會話你成日玩，冇努力過，有C係好應該。囝囝仲係細路啲，要push多啲，但佢好體貼！有次老師話囝囝叫佢畀條易啲嘅問題，畀一個成績麻麻嘅同學答，到時囝囝會叫埋同學一齊拍手鼓勵，我聽完真係好感動。」
教女擇偶如買鞋
昔日有追求者無數的李美鳳，有女初長成，教女擇偶猶如買鞋一樣。「曾經有三個男仔date囡囡去派對，佢唔好意思去推，怕應承其中一個後，被人認定係同對方一對，所以想唔去，我同佢講，唔喜歡就三個都唔好date，自己去玩一樣開心。我教佢擇偶好似shopping咁，你只可以買一對鞋，但唔好去第一間一見到即買，唔好買住，要睇勻成個shopping mall先，耐啲都唔緊要。」
「如果睇到滿意，可以做男女朋友，唔肯定可以保持多啲距離，否則會傷到人哋心，被拋棄會好難過！點知囡囡聽完話：『情願拋棄人先！』真係好好笑！我話你拋棄人仲難過！有個女性朋友分手後同女性拍拖做咗lesbian，我話，今次同男朋友傷心，下次同女朋友都會傷心，所以唔好悲觀到被人拋棄就起唔到身。」
以李美鳳樂觀積極的性格，面對有傳曾與李家傑有一段情，回應時也四両撥千斤，從容不迫。「哈哈，真係耐到唔知幾多個世紀，我同李生係入行前、讀大學時朋友介紹認識，佢係gentleman、好虔誠嘅佛教徒，就係咁多。拍拖？點為之係？拍拖定義好廣，就算date都唔出奇，我囝囝讀小二都送情人節朱古力畀女仔啦！」至於李家傑找代母產子榮升做父親，她真心的說替對方及四叔李兆基高興，「我都好感謝菩薩，賜我一對可愛嘅仔女。」
鋼琴之戀
看着兒女逐漸長大，李美鳳坦言可開始有自己時間豐富人生。當初陪子女學鋼琴的她，為可幫手指正他們的技巧而學琴，想不到十指下的悠揚樂章，令她對鋼琴戀戀不捨。「自己嘅夢想，係想將來彈琴水準可以去到performance level，彈琴可以令自己冷靜、recharge，每次彈完都好舒服。另一個夢想，就係仔女讀大學時，我同老公可以環遊世界，再honeymoon一次外，想積極行善，施比受更有福，幫助有需要嘅人，當中嘅快樂係買唔到。依家我仲諗住約吓啲女朋友，同佢哋去吓museum、學毛筆字、旅行或踩單車，人生嘅精彩唔單止來自家庭，自己要懂得尋找快樂。」
與女兒的成長紀念
身為Estee Lauder「Re-Nutriv白金人生大使」的李美鳳，和女兒一起設計以「變煥‧新生‧Re-Nutriv」為概念、名為「攜手樂活」的慈善限量版絲巾。花了三天創作的李美鳳說女兒延續自己的生命，也令自己重生。「絲巾裏面嘅手係代表人嘅創造力，為自己創造人生、為世界做好多事，絲巾入面有兩對唔同pattern嘅手，寓意係一代接一代，以無限創造力去創造美好將來。」她笑言囝囝本畫了一家四口、但全部都係《Transformers》（變形金剛）的造型，「我型到好似超人咁，腳會噴火，個身有好多gadgets，但要配落絲巾就唔適合，但我都鑲起佢，留番有機會再用。」
採訪：Winnie Choi
化妝：Candy Law
髮型：Ray Chan (Hair)
服裝：Dolce & Gabbana , Joseph Li@Joyce Boutique