自從3年前以獨立車系投放市場以來，日產（Nissan） 戰神GT-R喺世界各地備受追捧，更成為一眾歐洲Super Car軍團嘅假想敵，實力可見一斑。然而要鞏固喺超跑界嘅領導地位，必須要不斷提升戰力。有見及此，日前廠方公布咗GT-R 2011年改款，馬力升級至530匹，更新增多款特別車型，令「神之一族」聲勢更壯大！
日產於10月初舉行嘅法國巴黎車展上，發表小改款嘅2011年款GT-R，不過當時未有大肆宣傳，直到早前終於公布有關資料。動力方面，採用咗一台VR38DETT型3.8公升引擎，並透過改良Turbo裝置，重新調整增壓值、空燃比與汽門正時，並且減少進氣及排氣之間嘅阻力，最大馬力輸出由485匹增加至530匹，最大扭力則增至62.5kgm。而Spec V車型的最大扭力更達64.5kgm，令加速表現更強更勁。
與此同時，新一代GT-R採用環保催化器，排放及油耗都有更佳表現，廢氣排放可通過日本低排污標準，油耗降低至平均8.5km/L。另一方面，對應汽車嘅高性能動力表現，車體結構上都進行咗一定程度嘅強化，好似喺車頭加裝咗碳纖維頂Bar、於車架多處位置加焊等，不但有效吸收行車時嘅衝擊，更能夠減低車架變形嘅可能性。
雖然整體外形跟上一代大同小異，但係車頭嘅改動都唔少，例如加大進氣口嘅尺碼，又喺頭泵把兩邊加入LED霧燈以及類似魚鰭嘅擾流設計，根據廠方資料顯示，呢種設計可增加約10%嘅下壓力，同時將空氣引導至前輪，增加前輪煞車碟嘅冷卻效果。車尾部分亦有類似改動，如尾輪後方增設氣流孔、中央部分設置下擾流，為車尾部分增加10%下壓力。此外，煞車碟尺碼亦增至390mm，配合全新鍛造鋁合金輪圈，以及薄身跑車胎，型仔之餘加強咗制動力同操控性！
內櫳方面，中控台位置加入碳纖裝飾，配合熏黑嘅冷氣風口金屬圓框、跑車型桶椅等裝備，令車廂散發出一種戰鬥氣息。廠方喺中控台新增3個切換行車模式掣，包括節能模式、2WD驅動模式、運動模式，大大提升駕駛樂趣。另外，當行車速度低至10km/h時，車上嘅動力輔助系統會自動改變，令軚盤轉動幅度減至原來嘅一半，低速行車時扭軚輕鬆不少。新車將於本月中喺日本登場，售價由8,694,000日圓（折合約HK$833,000）起 。
除咗原先推出嘅Pure edition、Black edition、Premium edition及Spec V四種型號之外，廠方更額外追加兩款特別車型，包括落場版Club Track，以及備有豪華配套嘅EGOIST，前者專為賽車迷而設，未來廠方仲會舉辦駕駛訓練課程及統一規格賽，讓車主一圓賽車夢；後者不僅搭載碳纖維尾翼、六幅式鍛造鋁合金輪圈、鈦合金排氣喉裝飾等與Spec V車型相同嘅配備，另外仲有Bose音響、菱格紋手工縫製嘅真皮座椅等配備，展現出截然不同嘅奢華氣息。
撰文：賴以堅