Sonic Free Riders地板當滑板
Kinect for Xbox 360好快就會在香港推出，除咗幾隻由Microsoft Game Studios自家炮製的Kinect遊戲之外，不少遊戲大廠都會在Kinect推出同期出新Game，好似Sega就有「親身操控」的飛行滑板遊戲《Sonic Free Riders》。玩家要踩住虛擬飛行滑板，全體感地做出加速、轉向、執拾金幣，同埋用盡各種方法狙擊對手，好玩又刺激！
似足真實踩板動作
如果大家好記性，或者會記得Sega在3、4年前出過隻滑板遊戲《Sonic Riders》，新作《Sonic Free Riders》其實都大同小異，但就唔再用手掣操控，大家可以企在飛行滑板上，親身體驗這個速度感甚強的遊戲。不過，所謂滑板其實只係大家屋企的地板，因為Kinect遊戲平台係唔需要控制器，所以唔會好似Wii遊戲一樣要用Wii平衡板操作，只需做出好似真實滑板動作就玩得到。舉例說如果大家慣用右腳踩地加速，只要以左膊頭面向Kinect鏡頭，身體企位跟鏡頭形成90度角就得，要加速時將右腳踏前然後向後蹬，要轉向時就將身體向前或向後傾斜，同踩真滑板好相似。
動作多多夠有趣
遊戲動作方面都有幾多花款，如要做出《Sonic》招牌執金幣動作，只需向住有金幣一方伸手，系統可以感應到玩家手部的動作，亦能夠反映到遊戲畫面所操控的角色之上。另外，當所控制的角色跌入水時，只要兩手不斷狂撥模仿游水動作，就能加速返回地面，如畫面畀其他角色使用道具整朦的話，就要伸出雙手狂抹，令畫面變清，操作簡單又直接。在賽道上可以執起各種道具攻擊及騷擾對手，但所使用的動作都幾唔同，好似可用上投方式掟出導彈，用下投方法投出炸彈，用Shake Shake Shake方式使用流星錘攻擊，玩法都幾有趣。
四人接力Party Game
當然，一個人玩都未夠開心，《Sonic Free Riders》已支援到雙人模式，除了正常採用分割畫面的雙人對戰模式外，仲加入「合體」協力模式，可以由兩個玩家面對面，手貼手地做出同步動作，大家試諗吓，如果兩個大男人手貼手一齊玩，一齊「依嘩鬼叫」，畫面都幾「有趣」！遊戲仲可以支援到四人一齊玩，但就唔係將畫面分成四份，而係採用兩人一隊接力模式，講求同伴之間的反應同合拍程度，開Party時必玩！
類型：體感動作
開發：Sega
平台：Kinect for Xbox 360
推出日期：11月20日
售價：$328
查詢電話：2620 6667
撰文、部分攝影 ：布偉倫