懷舊飯店歎住家風味

鍾意大魚大肉,純粹個人喜好,但食得多山珍海錯,至發現原來最掛住屋企的家常便飯,窩心又暖胃;若無暇回家開餐,街外都有好選擇,像大坑開業不久的樂陶陶飯店,主打燒味、小菜及海鮮等,配以一室懷舊格局,感覺直情返咗阿爸阿媽嘅年代咁!

自家炮製靚燒味

話說樂陶陶的前身,是人氣小菜飯店,即使現在由「火車頭」老闆李先生接手經營,亦同樣走街坊路線,還繼「喜喜冰室」後再玩懷舊Feel,像店前的霓虹燈、內裏的百葉簾、綠色膠枱布及牆磚等,還將是日靚餸寫在鏡面上,夠晒特別,食客更猶如街坊街里,重現老香港情懷!

點菜時必試靚燒味,新店保留原來飯店的廚房班底,大廚手藝當然有水準,再自設工場炮製燒味,數量、出爐時間自己話事,出品新鮮熱辣。選料方面亦很嚴謹,精選新會潮蓮靚鵝、靚脢頭及三黃雞等,點個拼盤就可試齊晒,伴碟更有幾乎失傳的廣東蠔油豆,粒粒香甜好送飯。

海鮮檔即點即煮

家常小菜亦見心思,Keep得住金漆招牌,像菠蘿咕嚕肉會用上新鮮菠蘿,更以山楂及酸梅做糖醋汁,甜酸味恰到好處;梅子醬爆骨則將豬腩骨先炸後煮,頗花工夫,難怪肉質如此鬆化香口。若愛開飯時「啤一啤」,店內的冰凍「戰鬥碗」應該合你心意,暢飲最盡情;傳統飯店必備的足料無味精靚湯,這裏當然不缺,原煲上枱足夠四人同享。

飯店晚市還獨有海鮮檔,是日靚貨像蝦、黃花魚、蟶子、扇貝及撻沙魚等,放滿門外車仔,而海鮮早已預先清理,方便即點即煮,煮法有多種選擇,包括豉汁蒸、薑葱煮、配冬菜或麵豉等,各適其適。特別一提,飯店既開在「火車頭」對面,亦分屬同門,安坐這裏便可兼嘗越南美食。

V.I.P.房搞飯局

老闆李生諗頭多,飯店原來另有V.I.P.房!打開門見到水晶燈、電視及酒架等,跟懷舊風飯店是兩種格局。房間可容納10至12人,不論新舊客都可以Book,既可散點菜式,亦能揀選特別餐牌,最正是每位奉送的甜品拼盤,全由前君悅酒店甜品廚師炮製,高質素之餘仲大玩新元素,好驚喜!

撰文:楊淑英

攝影:蘇榮基

模特兒:Patricia Y、Jennifer L(Omni Model)

查詢電話:2808 4228