懷舊飯店歎住家風味

自家炮製靚燒味

話說樂陶陶的前身，是人氣小菜飯店，即使現在由「火車頭」老闆李先生接手經營，亦同樣走街坊路線，還繼「喜喜冰室」後再玩懷舊Feel，像店前的霓虹燈、內裏的百葉簾、綠色膠枱布及牆磚等，還將是日靚餸寫在鏡面上，夠晒特別，食客更猶如街坊街里，重現老香港情懷！

點菜時必試靚燒味，新店保留原來飯店的廚房班底，大廚手藝當然有水準，再自設工場炮製燒味，數量、出爐時間自己話事，出品新鮮熱辣。選料方面亦很嚴謹，精選新會潮蓮靚鵝、靚脢頭及三黃雞等，點個拼盤就可試齊晒，伴碟更有幾乎失傳的廣東蠔油豆，粒粒香甜好送飯。

燒味拼盤 飯店自設工場燒製，可掌握出品水準及時間，精選潮蓮靚鵝、靚脢頭及三黃雞等，最愛食伴碟的蠔油豆，甜甜哋最好送飯！	脆皮炸子雞（限量供應） $168/隻 專揀約3斤重的三黃雞，醃好後再雪藏、上皮、風乾及香炸等，入口皮脆肉嫩，果然有水準。	菠蘿咕嚕肉 $68 用上新鮮菠蘿炮製，糖醋汁更混合山楂及酸梅而成，味道天然，甜酸味道剛剛好，夠開胃。
昆布海草生熟地煲唐排　 $55/煲 住家靚湯既無味精亦落足料，撈起即見唐排及雞腳，啖啖濃郁鮮味，每煲足夠四人享用，湯水每幾日轉換一次，唔怕飲到厭。	大坑小炒皇 $78 炒粒粒的升呢版，有蝦仁、帶子、青紅椒、叉燒及西芹等，佐酒送飯都得，即時令小記想起媽媽的手藝。	梅子醬爆骨 $68 豬腩骨先炸後煮，雖花工夫但勝在肉質鬆化而且肉汁豐富，配合梅子醬可中和一下油膩。
甜品拼盤（隨餐奉上） V.I.P.房的客人，飯後均可享用甜品拼盤，款式次次不同，這天就有意式奶凍、阿華田Creme Brulee及香檳提子白酒啫喱。

海鮮檔即點即煮

家常小菜亦見心思，Keep得住金漆招牌，像菠蘿咕嚕肉會用上新鮮菠蘿，更以山楂及酸梅做糖醋汁，甜酸味恰到好處；梅子醬爆骨則將豬腩骨先炸後煮，頗花工夫，難怪肉質如此鬆化香口。若愛開飯時「啤一啤」，店內的冰凍「戰鬥碗」應該合你心意，暢飲最盡情；傳統飯店必備的足料無味精靚湯，這裏當然不缺，原煲上枱足夠四人同享。

飯店晚市還獨有海鮮檔，是日靚貨像蝦、黃花魚、蟶子、扇貝及撻沙魚等，放滿門外車仔，而海鮮早已預先清理，方便即點即煮，煮法有多種選擇，包括豉汁蒸、薑葱煮、配冬菜或麵豉等，各適其適。特別一提，飯店既開在「火車頭」對面，亦分屬同門，安坐這裏便可兼嘗越南美食。

V.I.P.房搞飯局

老闆李生諗頭多，飯店原來另有V.I.P.房！打開門見到水晶燈、電視及酒架等，跟懷舊風飯店是兩種格局。房間可容納10至12人，不論新舊客都可以Book，既可散點菜式，亦能揀選特別餐牌，最正是每位奉送的甜品拼盤，全由前君悅酒店甜品廚師炮製，高質素之餘仲大玩新元素，好驚喜！

撰文：楊淑英

攝影：蘇榮基

模特兒：Patricia Y、Jennifer L（Omni Model）

查詢電話：2808 4228