煲戲燒劇L650藍光一家親

Blu-ray碟愈嚟愈普及，因為畫面實在靚到冇得頂！不過最令大家頭痛反而係用乜嚟睇，有人話二千幾蚊買部PS3打機順便睇埋碟夠經濟，計小記話不如買Toshiba新出嘅Satellite L650，平日細佬妹可以用佢嚟做功課、上吓網，假日仲可以駁大電視變家庭影院，打風落雨都可以喺屋企歎Blu-ray！

售價：$8,399

靚聲靚畫全家睇

L650睇得藍光，機能當然要有番咁上下，內置Core i5處理器、2GB DDR3記憶體，最正係配合埋ATI HD5650獨立顯示卡，畫質效能即時「升呢」，畀細佬用嚟打機都冇問題；實際睇藍光影碟時亦非常順暢，聲畫冇出現Delay情況，配埋個高清闊屏和杜比音效，就咁用電腦睇片都相當唔錯。如果唔想屈住喺十幾吋芒，仲可以經HDMI端子接駁大電視，咁就可以一家人搞個「星期日影院」啦！

阿媽煲劇可留底

平時阿媽最鍾意錄低劇集、電影慢慢睇，好彩L650內置嘅Blu-ray RW燒碟機，除咗可以播片外，仲支援Blu-ray及DVD燒錄功能，自製50GB藍光影碟冇難度！嫌燒碟麻煩的話，新機更內置640GB硬碟，文件、相片幾MB貨仔當然大才小用，但用嚟儲存幾十GB嘅高清片就啱晒啦！值得一提係L650預載Toshiba筆記簿常見嘅「Bulletin Board」，可以畀你放置常用程式、Memo等，啱晒大頭蝦用；仲支援Eco省電模式，下次可以大大聲同阿媽講部機好慳電！

雪白機身內有些少暗紋，大路設計。	HDMI可以接駁大電視睇片，將筆記簿變成家庭影院。	內置杜比立體聲音效，音質唔算好突出，在睡房睇片音量適中。
可以睇藍光碟就唔出奇，不過可以燒埋就少見喇。	睇Blu-ray之餘仲可以燒埋碟！

大鍵盤做功課

L650備有15.6吋大芒，機身摺埋大過張A4紙，好明顯唔係主攻流動用家。而作為Desktop Replacement機種，喺屋企頂替桌面電腦當然要用得舒服，所以鍵盤特別加入Full-size設計，連埋個獨立數字Keypad和多點觸控Touchpad，用兩隻手指就可將圖片或網頁放大縮小，搵資料夠晒方便，細佬妹用電腦嚟做功課自然更就手。