陳嘉容拒隨波逐流潮得起

跟陳嘉容（Eunis）說時裝，肯定是她最開心的事之一，只因她從小就熱愛時裝，投身模特兒界後這份熱誠更是無限量擴大。每天試盡天下各大小品牌的靚衫，預覽來季潮流總是快人一步，要數今期甚至下期流行甚麼又有何難度？但是想做時裝界的潮人不是只知甚麼是最hit就可以，自知也很重要，兩者缺一不可，Eunis說：「潮人一定要有潮流觸覺，喺時裝上就係要知道依家時裝界流行緊啲咩，但唔係興咩都放晒上身，一定要有自己Style，揀適合自己個性嘅嘢去着先會有個人風格。個人風格好緊要，唔係只會盲目跟隨潮流就叫潮。仲有唔係一定着名牌就叫好睇，mix & match其實先最睇得出個人品味同功力，平嘢都襯得好睇仲有成功感。」

參考明星衣着

Eunis說：「每一季都有hit嘅item，要知道個trend興啲咩嘅同時，亦要知道邊啲item係配合到自己嘅身形、職業、膚色、氣質、性格等等，搵到啱嘅嘢就會好自然打造出自己嘅風格。有時啲嘢自己未必可以成件carry到，例如豹紋，唔係個個受得起，有啲人着咗會顯得老，但又鍾意豹紋喎，咁就可以揀啲配飾同埋有少少呢樣元素嘅衫一湊豹紋熱。」

Eunis續說間中留意明星怎樣襯衫也無妨︰「另外，睇多啲時裝雜誌真係有幫助o架，甚至睇吓八卦雜誌都好，睇吓啲明星點打扮，如果自己真係唔識點着衫，間中跟吓人哋着法都無妨，當然唔係成個look照抄啦，而係學吓人哋點樣襯衫。」

陳嘉容最近主持時裝節目，教人穿衣扮靚之道。	陳嘉容每季都能夠快人一步試盡靚衫。	陳嘉容與馬詩慧（中）及姚予晴在大型時裝騷聚頭。

論盡hot items

談到今季的時裝潮流，Eunis即說得眉飛色舞，她說：「今個冬季有晒我鍾意嘅嘢，好興毛毛、animal print同埋lace，仲有鮮紅色嘅高跟鞋。毛毛最hit嘅梗係毛毛boots啦，任何長度嘅毛毛boots今季都好流行，但係就要好小心着，因為毛毛本身好易畀人有臃腫嘅感覺，襯得唔小心睇落就好易變得肥。長毛毛Boots要襯貼身嘢平衡番，短毛毛Boots就容易carry啲，可以襯牛仔褲同及膝嘢。而animal print當然以豹紋最hit啦，唔一定要成隻着上身，揀啲豹紋配飾一樣潮得起。lace可以着出女仔獨有嘅嫵媚氣質，同時又可以着得好型嘅，例如lace恤衫襯捲腳嘅牛仔褲再加對高跟鞋已經女仔得嚟又型型地。鮮紅色嘅高跟鞋可以為冬日帶嚟色彩，夠晒sharp醒。時裝品味會隨年月有所轉變，我以前鍾意啲簡約啲嘅衣着打扮，鍾意啲淨色嘢，呢幾年就變咗好鍾意花花、lace、玫瑰、ruffles同蝴蝶呢啲花巧啲同女仔啲嘅嘢，覺得呢啲先係我嘅style，只要搵出屬於自己嘅風格，着咩都可以着得靚。」

陳嘉容只要一談時裝即可以滔滔不絕。	陳嘉容愛這條豹紋裙高貴中帶點野性。	女性化得來又具型格的服飾是陳嘉容的至愛。
毛毛boots是今個冬季的must have item。	女士們可以豹紋高跟鞋一湊豹紋熱。	紅色高跟鞋是冬日搶眼之選。

欣賞曼玉有個性

Eunis心目中的頭號fashion icon是柯德莉夏萍，她說：「佢真係好經典，打扮好靚，就算依家睇番都唔會out。仲有張曼玉、章小蕙同埋容祖兒着衫我都覺得好好睇。張曼玉好有個性，佢本身身形靚又有氣質，漫不經意咁披披搭搭都好靚。章小蕙好識得隱惡揚善，佢唔係天生模特兒身形，但就好識得藉着衫去突出自己優點同隱藏自己缺點，咁先至係高境界。容祖兒呢兩年喺着衫方面進步好大，好多時都有驚喜。」

最愛品牌逐個捉D&G又型又Lady

Eunis自言做模特兒可以試盡天下靚衫，快人一步預覽各大師級設計所以很幸福，在芸芸國際時裝品牌當中，她最喜歡的品牌包括有D&G、Chanel、Gucci、Valentino。她說：「呢幾個品牌好有自己嘅風格及特色，唔單止每季都keep到水準，仲愈來愈靚，好似D&G個2011春夏ready to wear系列，啲花花嘢真係超靚，充滿女性美得嚟又好型。」

採訪：張嘉敏

攝影：劉智源

髮型：Eve Chiu@POP Hairdressing