投影DC大晒47吋二人世界

香港寸金尺土，難得二人擁有安樂窩，當然要珍惜屋企嘅地方。Nikon剛推出新一代投影相機Coolpix S1100pj，就可將遊山玩水時記錄嘅片段和相片，返到屋企即時投影出來，連投影機嘅地方都慳番，大宴親朋晒幸福話咁易。

720p甜蜜片段

無論係情侶定夫妻，相信都一齊去過好多地方，有共同嘅經歷，透過S1100pj便能將開心事情用靚相和短片記錄下來。作為一部輕巧型DC，S1100pj提供自動場景及智慧人像等模式，配合28~140mm變焦及面孔偵測功能，去旅行影「到此一遊」相又得，Zoom近對方表情攝錄1,280×720高清短片亦得，拍出甜蜜回憶。

隨時投影47吋巨幕

影完相、拍完片返屋企，唔使將檔案傳輸到電腦咁麻煩，利用新機獨有的投影功能，舒舒服服坐喺梳化，即可睇番所有片段。機仔細細已可投影出47吋屏幕，分分鐘大過屋企部電視，雖然亮度得14流明，要調暗室內燈光先睇得清楚，但三千幾元有部投影DC，可將生活趣事隨時與親朋好友分享，夠晒抵玩。最吸引是S1100pj內置電阻式觸控屏幕，投影時仲可在芒上畫有趣圖案和寫字，想搞氣氛都冇難度。

售價：$3,480	改用輕觸式屏幕令機背只保留短片功能鍵、場景模式鍵及播放相片鍵。	機底設有站立座，方便擺在桌面，輔助相機投影至較高角度。
S1100pj提供遙控及輕觸筆，方便投影時使用。	開啟投影功能時，可以選擇幻燈片模式、面部修正或畫筆功能，即時加上有趣圖案。	投影裝置內設有小鏡，讓畫面能反射到牆上，最大可投出47吋巨幕。

發揮無限創意

S1100pj除了可投影生活照及短片，還有甚麼用途呢？想給對方驚喜，可以在餐廳突然投影甜蜜相片，用呢招來求婚肯定冧爆。二人世界去旅行時，仲可先拍低複雜的街道和地圖，萬一盪失路都可以投影到牆上確定位置，咁就唔使周圍搵路牌。此外，機身還可以USB連接電腦，將電腦內的影像及文字投影出來，開會時便可播PowerPoint畀人睇；如果唔介意投影畫質只有640×480，更可充當流動影院睇戲，不過要留意最長投影時間得1小時左右，之後就要充電再播了。