何超儀另類潮文化

跟超儀談潮流，她劈頭一句竟然說：「我絕對唔係一個潮人！」O了嘴，幸好她即時接下去：「喺我心目中嘅潮人係要有文化，唔一定要讀書多，但要對自己嘅起居飲食有要求，而呢啲要求就喺佢本身嘅文化知識帶出嚟！」很玄吧？她笑說：「好多人覺得潮人就係着衫好前衞，我覺得衫係人嘅另一層皮，你着咩衫就代表你係咩人？我自己着衫其實好簡單，講都冇人信，我屋企最多係one-piece裙，因為我唔鍾意配襯，one-piece裙就唔使煩，你着牛仔褲都要襯件T-shirt啦！」

欣賞菊地凜子

也許如此，超儀心目中的潮人，並不是人人所供奉的潮神，而是外國組合The Kills成員Alison，她說：「佢着衫好有自己性格，永遠只係窄身牛仔褲同埋牛仔靴，但着到好有rock嘅感覺，我自己就覺得好正！」那亞洲潮人呢？她點了菊地凜子：「我真係研究過佢嘅味道，試過睇佢一場戲，佢着住校服，但唔着底褲去勾引一個男人，我覺得佢去得夠盡，呢種性感畀你剝晒衫仲要大膽，但感覺一啲都唔核突，佢演繹到好豪放嘅感覺，我自己就唔夠薑！」何超儀的另類味道，還有黃秋生：「我覺得秋生哥好啜核，佢個人好有文化，講每一句說話都好有根據，我記得我問過佢點解咁鍾意着格仔衫？佢真係解釋到畀我聽，佢唔係亂嚟架！」

潮流不斷循環

那香港人潮嗎？超儀有另一番見解：「其實我覺得香港人幾有型，好多年前大家只會覺得日本人先有型，依家香港人都追得好貼，成個感覺好企理舒服，反而西方國家呢方面仲好參差，不過呢個係優點亦係缺點，就係因為大家都一齊進步，所以大家就變得一模一樣，冇咗自己！」很有潮味卻自嘲並不潮的何超儀如何看時裝潮流？她說：「我覺得依家嘅潮流已經唔可以再創造一種新嘅時裝品味出嚟，佢只不過不斷循環復古，就演變出一種所謂嘅新潮流！」

子聰已到化境

記者笑問老公陳子聰潮不潮？她笑說：「除咗打扮，佢成個人都好潮！佢嘅潮係喺思想上面，佢已經到咗化境，佢好在意要發放正能量畀大家，畀呢個世界，聽得佢多我都跟咗佢，心境夠潮，個人自然有潮味！」近年的何超儀明顯「修心養性」了不少，相信陳子聰居功不小。

後記：跟何超儀做訪問後，像有了新的領悟；原來我們一直所追求的潮流，就正如她所言：只是人的另一層皮，最後都會化為灰燼，反而人於思想上的追求，才是值得流芳百世吧！這是一種很深奧的學問，願各位潮人共勉之！

超儀與老公陳子聰是一對活寶。

超儀外表cool爆，但其實很有「heart」。

興奮拍荷里活電影

何超儀近日代表香港參與荷里活電影《Contagion》的演出，早前在香港完成拍攝戲份。電影講述香港沙士事件，有份參演的其他荷里活演員還有型男祖迪羅、麥迪文、羅倫斯費斯賓及兩大奧斯卡影后琦溫斯莉和瑪莉安歌迪雅等，能夠與一級國際影星合作，難怪超儀表現得相當興奮。完成電影拍攝後，超儀就要為唱片錄音，一向對音樂充滿熱誠的她，笑言唱片不會在今年內推出，因為需要一段長時間製作，也深信「慢工出細貨」的至理名言。

超儀熱愛音樂，稍後將會再出碟。

超儀已完成《Contagion》在港拍攝的戲份。

慈善相集晒女人味

Max & Co.早前邀得何超儀、張靜初等拍攝慈善相集，超儀笑言雖然自己是個藝人，但卻喜歡拍攝多於被拍，不過今次與著名攝影師CK合作，令超儀很享受被拍攝的感覺，她說：「我好怕被一大堆人望住影相，因為覺得會好唔自然，但今次影相就清咗場，計埋我同CK都係得三個人，所以我可以好放，影完呢輯相，我發覺原來自己可以咁靚、咁有女人味！」

採訪：Ada Lam

攝影：司徒國榮

化妝：Karry Wong

髮型：Vic Kwan

服裝：Max & Co.