Michael子羚曼谷片車去七岩

風馳電掣

Michael親身示範泰國自駕遊，原來，比想像中容易得多。你只要在香港登入租車公司Master Car Rental的網站訂車，或是透過指定旅行社落「柯打」，去到泰國曼谷機場後，找到租車櫃位，填張表格、畀按金（20,000 Baht起，約HK$5,000），就可以揀車了，包括寶馬325i開篷跑車、寶馬X3、Mini Cooper開篷車、Honda Accord及豐田Communter等，車上有齊英文GPS導航，唔怕盪失路，好方便。我們一行人辦好手續，隨即浩浩蕩蕩向七岩進發。

七岩距離曼谷約2個半小時車程，我坐着Mini Cooper，在高速公路上飛馳，道路又直又闊，最快還可以踩到120多公里高速行駛，爽呀！沿途景物飛速向身後掠過，景色由高樓大廈，變成油綠綠的山丘、稻田，2個半小時話咁快就過，到達我們下榻的Alila Cha-Am度假村。

在機場租車櫃位辦好手續，就可以出發了。	途中可隨時停車，又食又買。	自駕遊所看的風景，更貼身、更壯觀。

海邊度假村

度假村在08年開業，同年已被Conde Nast Traveler USA Hot List 2008，評選為亞洲33間優秀海邊度假村之一。度假村臨海而建，住客足不出戶，已可欣賞海天一色的靚景，仲有私人沙灘，讓你享受寧靜，怪不得Michael同Elaine都話正！

入住擁有私人泳池的獨立別墅Pool Villas，樓底足足兩層高，空間感十足，配以簡單的灰色牆壁，反而凸顯原始風味。而我最欣賞的是那浴室，大得說話都有回音，天花安裝了Rain Shower，淋浴時就像雨水傾瀉而下，我突然想起林峯那首《Let's get wet》，原來沖涼可以咁爽！

房間樓底極高，空間感十足。	以石頭堆砌的走廊，掛滿畫作及攝影作品。	Pool Villas氣派豪華，點止住得舒適，直頭招積。

豪歎豪食停不了

度假村內還有很多好去處，那裏的石頭走廊活像一個Art Gallery，油畫、相片舉目皆是，讓你眼睛來一趟清新的Spa。來到餐廳Motion，則可品嘗傳統地道泰國菜，像沙嗲串燒、豬肉檬粉、肉卷等，賣相討好，味道酸辣惹味。Michael大讚食物夠新鮮，口味夠地道。飯後到Spa Alila 歎個香薰油按摩，將疲勞一掃而空，才叫真正度假！

Alila Cha-Am

地址：115 Moo 7, Tambol Bangkao, Amphur Cha-Am, Petchaburi 76120, Thailand

房租：由4,200 Baht起（約HK$1,050）

Pool Villas由11,700 Baht起（約HK$2,925）

Spa：由4,200 Baht起 / 2小時（約HK$1,050）

遨遊備忘

簽證：持BNO或特區護照均毋須簽證

機票：乘坐泰國國際航空香港至曼谷來回經濟客位機票約$1,540起

查詢：2179 7700

貨幣：HK$1約兌4 Baht

天氣：10月氣溫約26oC~35oC

特派記者 ：羅安琪

鳴謝 ：泰國政府旅遊局、泰國國際航空、Master Car Rental