ENVY14×Beats靚聲孖住聽

星期日最好係同屋企人飲個早茶，再喺屋企攤抖吓、聽吓歌。不過一個人聽歌睇片似乎悶咗啲，HP就新返咗部ENVY14筆記簿，同著名耳筒品牌Beats大玩Crossover，竟然內置Beats靚聲喇叭之餘，仲加入雙耳筒設計，最啱兩姊妹一齊分享心愛音樂，加上14.5吋高清靚芒，假日煲劇都冇問題！

Beats版黑紅夠型

相信唔少用家都聽過Monster Beats嘅產品，之前同Lady GaGa、姚明等名人玩Crossover，今次踩入筆記簿巿場，同HP推出ENVY14 Beats Edition。先講外觀，ENVY14以黑紅作為主色調，機面印有大大個Beats Logo，貪靚的姐姐就最Buy！打開機身，估唔到連Keyboard都咁型，一按掣朱古力鍵盤會透出紅色背光，稱得上「暗」藏玄機，夜晚兩姊妹在被竇玩Notebook都唔怕按錯掣。

雙耳筒設計分享歌曲

話晒同音響品牌Crossover，當然比較着重音效功能。ENVY14配備Beats雙喇叭及Beats Audio技術，播放音樂時扭到勁大聲都唔會拆，機身仲內置兩個3.5mm Audio插口，兩姊妹聽歌都唔使爭耳筒。最震撼是跟機送埋價值$1,600嘅Beats Solo耳筒，包耳式設計隔聲一流，仲可以摺埋擺入袋拎出街，夠晒方便。此外，耳筒將多送一條線控連咪，隨時上網同遠方親友Chat都掂。

黑色鋁合金機身，加埋個紅色Beats Logo，型仔！售價：$14,980

（左）14.5吋芒睇戲勁靚！
（右）有冇我咁靚？

送埋Beats Solo耳筒，畀家姐駁iPhone聽歌都得。

高清屏幕好戲盡享

ENVY14採用14.5吋1,366×768闊屏幕，仲內置ATI HD5650獨立顯示卡，睇高清片固然冇問題，用嚟打機都綽綽有餘！當然，踏入高清年代，新機另備有一組HDMI和Display Port插頭，方便你連接大電視全家人觀賞電影。雖然部機賣成$14,980，但有名牌效應加埋頂級配置，包括Core i7四核心處理器、8GB DDR3記憶體，就算玩埋剪片執相都唔怕窒。

放大圖片	朱古力鍵盤特別在「B」字換成Beats個嘜頭，仲有紅色背光。	機身厚29.5mm，拍埋同個一蚊差唔多高，以14.5吋大機來說算幾薄。
正前方可見Beats喇叭，高音和低音都做得唔錯。	跟機附送Beats Solo耳筒、線控同耳筒袋，成套都黑紅色，係咪好襯呢？	比較少見嘅雙3.5mm Audio插頭，可以同姊妹一齊聽歌，而左邊仲可收埋音。
機殼同樣採用鋁合金物料，而8-cell電池大約可用到4小時。	Beats Audio嘅控制台，特製介面可以調校各種音效設定。	採用Slot-in食碟式設計，除咗夠型之外，仲可用來睇戲和燒碟。
獨有的Beats版《Music Player》，學足《iTunes》玩封套預覽，頗有心思。