袁詠儀為魔童回復本性
出名敢怒敢言的靚靚（袁詠儀），初出道時曾自恃個性使然，致得罪人多、稱呼人少，美德即時變質，承受過不少惡果；自從做了媽咪，與兒子魔童的相處，令她明白到教導小朋友首要坦白，且重新欣賞自己率直個性。
靚靚與張智霖（Chi Lam）拍拖十四年，06年懷有魔童（張慕童），不經不覺，魔童經已三歲半，現就讀幼稚園，靚靚在當媽咪這三年半裏頭，領悟出一個道理：「娛樂圈可以圓滑，但對小孩不得不坦白。」
她說自己有一個姨甥，年紀跟魔童相若，半年前姨甥在學校與同學發生推撞，當時她向姨甥查問事件始末：「姨甥話人哋推佢，但老師就話係互相推撞，嗰刻我喺度諗點解佢會唔認，識得講大話，我冇即時責罵佢，觀察佢一輪，發現佢身邊嘅長輩都慣性會講一啲小大話，其實都係一啲小事，好似有人拎走咗隻杯，之後唔認係自己做之類，原來姨甥模仿咗大人，由嗰時開始就明白對小朋友一定要講真話，因為要身教。」
目標要生三個
靚靚說魔童性格獨立、隨意、喜歡自己同自己玩，這方面似足張智霖，另一方面，他性格好急進，與靚靚個性十分相似。她認為獨生子女要背負的壓力太大，不希望魔童將來一個人面對所有事情，直言有意再生，早前靚靚被指要到輔助中心求子，現年三十八歲的靚靚，目標要生三個，雖然生仔時間表開始得太遲，不過現時無需要求助於輔助中心，她覺得香港人生活壓力大，又太多引誘，所以生兒育女一定要有計劃，不能單靠順其自然，事實上她的生育計劃正在進行中，亦明白她這個年紀已不能太貪心，不會強求生仔或生女。對於有人揀選BB的性別，她即發揮其敢言本色，說：「其實人工受孕已經係違反，再揀生男生女係咪仲違反？」
呷醋仔錫老竇
與小朋友相處，做父母的通常是一個飾演好人，一個飾演壞人，「Chi Lam話佢同魔童係朋友，我冇得揀只有做壞人」，在毫無選擇餘地下，眼見魔童好錫Chi Lam，她直言初時也會呷醋，之後卻想通了，她說：「如果第時生個女，巴結佢，要佢埋我堆囉！」話雖如此，她與魔童亦有很深母子情，早前她出席Lancome活動時，直言因捨不得短暫離開魔童而曾想過甩底。
四圍去睇動物
雖然魔童才三歲半，但小小年紀的他，已到過很多地方，如日本、台灣、新加坡和澳洲，靚靚說王家衛曾經跟她說過，周遊列國放眼看世界，人生的閱歷等如閱讀了很多本書本一樣，由於魔童很愛看動物，故靚靚每計劃出發到一處地方，總會問同一個問題：「嗰度有冇動物園？」
得獎實至名歸
靚靚憑率直個性，在剛過去的《Lancome 75周年法式卓越慶祝午宴》，獲頒「率真女性獎」，可謂實至名歸，性格獲得「肯定」，同場獲獎的女性，全屬擁有傑出成就的新女性，包括獲得「完美女性獎」的關之琳、「品味女性獎」的時尚名人郭志怡等。
髮型：Vic Kwan @ Hair Culture
化妝：Ling Chan @ Zing the Make Up School