12吋武則天嘉玲駕到

電影Figure再上路

提起威龍玩具，一般玩家未必聽過，但有玩開軍事Figure就一定知道這間老牌玩具廠，多以生產12吋兵仔為主，為何今次突然轉做電影Figure呢﹖威龍解釋：「其實我們以前都做過《中華英雄》同《重裝警察》等電影Figure，由於要顧及海外市場才暫停生產；但隨着近年玩家口味轉變，我們早已準備重投這市場，適逢華誼兄弟來敲門，自然一拍即合！」

皇袍勁逼真

今次電影嘅主線人物都被Figure化，但若講服飾配套，做皇帝嘅武則天劉嘉玲就一定最正。以皇袍為例，整件衫由多層Layer縫製，表層為絹，柔軟兼具光澤，領口位則係織綿布，可造出層層繡花；最誇係背脊幅鳳凰展翅圖，需用電腦車花把原隻鳳凰織出，栩栩如生氣勢逼人！造工如此精美，又點估到係用一星期時間倉促製作出來呢。

皇袍背部用電腦車花織出鳳凰圖案，仲要拖晒尾，呢啲咪叫氣勢囉！

鳳冠前端的珠仔係用人手逐粒串上，每條有39粒，心思教人佩服，不過若搞好埋個頭雕，整體就更加完美。

關節靈活穩固

整得Figure又點少得素體，今次沿用威龍第3代Body，好處係關節多、Ball Joint較為穩固，玩家扭動手腳擺甫士可以更加盡情。可惜以今時今日Figure頭雕精細度來說，威龍的技術確實有待改善，例如今次除雙眼較似劉嘉玲外，其他部分都未算完美，幸好威龍已表示將會重金禮聘韓國頭雕師，相信日後水準必定提升。

皇袍有多層Layer，袖口則係織綿布，可輕易壓印出多種花紋！	今次連鞋襪都跟足戲服，鞋頭更有金屬蝕刻裝飾。	上官靜兒係女兒身，所以Body會比一般Figure矮，沿用威龍第3代Body，擺大動作甫士都冇問題！售價︰$980

同場加映

冰冰玩皮鞭

戲中常用的皮鞭真係能屈能伸，而腰間更配有金屬配飾，用料落足本。

表面雕有「御前侍衞上官靜兒」幾個大字的令牌，唔係求其貼張貼紙就算。

除了劉嘉玲外，戲中還有另一女主角李冰冰。雖然她飾演的上官靜兒擁有多個造型，但威龍只選取最具代表性的東方不敗Look作藍本。服飾比較樸實，上身是白色雪紡披肩，內層則以紅色腰帶配絹布長袍，跟足戲服有晒暗花。而身為御前侍衞，武器自然唔少得，備有戲中常用的佩劍和皮鞭，像真度頗高。