前幾天閱讀了一篇文章，提到我將要造訪的挪威。文章說到大家都是北歐凍土，鄰國瑞典的時尚可以花枝招展走向世界，但挪威似就欠奉，Fashion這回事在這裏可以放在一旁。彷彿第一時間告訴我：「想在挪威睇嘢買衫？慳啲啦唔該！」
不過文中最後都補充了一點：不搞自己的行頭，留點力氣為生活其他方面整色整水。對，印象中北歐人很愛為個家「裝身」，所以在奧斯陸我應該可以有時間留給「逛逛生活雜貨、家品店」這門事情上，去一去昨天提到的TING，又或者這一所HAY。HAY其實不是挪威產物，而是來自「南方」的丹麥的Interior Brand，家品、家具以簡潔流麗、耐用、實際、有空間性的設計為大前提，但光在網上見到HAY的產品，都會令我立即聯想到：冇錯，呢啲就係北歐Design。
哪怕是一個Cushion、一張Lounge Chair都是襟睇襟用……以及價錢襟計！話雖如此，去年9月HAY終於都登陸奧斯陸，立即受到好評。我想大抵上北歐都是有一個共通點──他們對家品、家具很長情，更視為一種長線投資。可能是因為天氣使然令他們要呆在家裏一段長時間，因此要一些耐用之餘又要「對得耐都唔會悶」的東西。記得有一位芬蘭普通打工仔對我講過：「我呢張普通不過嘅梳化買咗5,000歐羅，可以坐足廿幾卅年，唔貴呀。」有「五皮」在手，香港人可能已經走去抽新股或者買名牌袋……幾時輪到個家用？
旅遊撰稿人