劍雨Online為女擋刀闖江湖

電影氣勢 名師打造

雖然有電影做後盾，但《劍雨Online》並唔係搬字過紙咁簡單，可由玩家扮演新人物，與電影角色及情節產生互動。但要在MMORPG做到一如電影嘅畫面確實有啲難度，除見到「泰山十八盤」、「太湖」等中國特色景點外，遊戲中主要場景如「云何寺」、「馮國公府」同「驛站」等，都有電影七、八成感覺；最吸引是連服飾都做得相當仔細，保留到電影版名設計師和田惠美所打造嘅精髓。

買兇求饒 為女犧牲

電影故事講主角為搶奪「寶物」而招來連番惡鬥，《劍雨Online》將江湖恩怨遊戲化之外，更加入咗唔少有趣嘅構思，例如玩家可跟NPC和電影角色交流，仲加入多個新系統，好似「買兇」、「緝兇」、「講價」等，令低等級嘅玩家都可借刀殺人，就算光明正大打輸咗，都可以跪低向對方求饒；等到有高嘅等級和名聲時，仲可以在客棧買道具講價，有啲似去街巿買餸嘅師奶。但講到最型始終係「為女犧牲」嘅新系統，可在危急關頭捨身替女同伴擋刀，話唔定在現實世界都博到女玩家好感！

寵物坐騎 提升能力

遊戲另一特色是可以捕捉同帶住怪物行走江湖，由可愛嘅「貓娘」到威猛嘅「百獸之王」都有，雖然設計有啲超現實，但最緊要係玩家覺得過癮。而《劍雨Online》五個職業（天振俠士、羅剎力士、傀儡師、禁咒師跟舞樂師）仲可將怪物進化成坐騎代步，識得跟隨角色升級之外，可幫玩家提升速度同能力，要行走江湖就要養隻勁寵物助你一臂之力。

類型：MMORPG

開發：Gamania

封測日期：10月中

公測日期：11月

查詢電話：3711 5511

下載費用：免費

撰文 ：布偉倫