早三個禮拜前，Capcom先行在Xbox LIVE上出咗隻《Dead Rising 2: Case 0》，畀大家預先知道新作故事嘅來龍去脈，打吓喪屍熱吓身。到今日推出嘅《Dead Rising 2》正式版就唔再偏心，Xbox 360同PS3機主都有得玩，可以在72小時內響賭城用盡意想不到嘅武器殺喪屍，仲能夠約埋朋友合力用計仔圍剿敵人，勁爽！
《Dead Rising 2》故事設定在第一集故事之後嘅幾年，上次主角Frank好彩在滿布喪屍嘅大商場成功逃生，但係喪屍殺極都殺唔完，而且仲蔓延至全個美國；今集交上惡運嘅係帶住女兒逃亡嘅越野電單車手Chunk Greene，要喺賭城Fortune City入面逃過喪屍追殺。雖然古仔、場景同主角都唔同咗，但遊戲都係要玩家在72小時內逃出生天，搵唔到出口就係咁先。
上集身為記者的Frank要靠影低喪屍咬人嘅「靚相」買裝備，但到《Dead Rising 2》就大打溫情牌，男主角Chunk為咗受到喪屍病毒感染嘅愛女Katey，需要買抑制喪屍化藥物Zombrex，結果走到賭城做爛Show賺錢。
上集《Dead Rising》已經可以畀玩家隨手執起商場內嘅物件打喪屍，甚至乎可以將成張櫈車埋去，今集故事搬到賭城，可用嘅「武器」比商場時更多，仲可以畀大家玩組裝，例如將兩個德州電鋸殺人狂所用嘅電鋸裝落獨木舟船槳，邊行邊鋸喪屍。
呢個名為「Combo Weapons」嘅系統仲有乜嘢玩？只要有創意其實可以發掘出更多「攞你命3,000」，好似將火把同網球拍二合為一嘅Blazing Aces、用大聲公發出音波功震爆喪屍嘅Air Horn，甚至將機關槍縛在輪椅上變身成Blitzkrieg衝鋒車，非常搞鬼！
嫌用各種武器打喪屍未夠過癮，今集仲引入二人Co-Op系統，可以孖住朋友一齊諗計打喪屍，例如由一人做餌引大堆喪屍聚集，然後另一個玩家開機關槍掃射，又或者打爆滅火筒一次過爆死大批喪屍，非常好玩。除咗「殺殺殺」之外，今集都有啲支線任務畀大家玩，好似將賭城入面嘅幸存者帶到安全地方，亦可參加賭城內嘅娛樂比賽，賺取Prestige Points將能力值同武器升級。
《Dead Rising 2》入面亦追加咗唔少有趣嘅新系統，既可以從賭城後台搵靚衫換，仲可以慳水慳力地騎住越野電單車喪奔，不過要Keep住食嘢補充體力，同埋切忌飲咁多酒，唔係真係會飲到嘔！
類型：動作
開發：Capcom
平台：Xbox 360、PS3
推出日期：今日
售價：$298
查詢電話：2366 1001
撰文：布偉倫