不跟潮流 只做自己 何志恩型人告白
接受訪問前，何志恩剛剪了一個「林亞珍」頭，莫以為她在暗示下季流行六十年代（或者下季真的流行六十年代），但她從來不喜歡跟在潮流走，只會做自己，有人叫她不要穿着格仔衫、戴眼鏡在街上走，但相信她一於少理，只要她喜歡。或許有日你在街上會遇上這位林亞珍，她就是本地時裝設計師何志恩。
見到時裝界潮人或者設計師，有兩個問題必定會問：「下季興乜？」以及「有乜係must have item？」如果你問着何志恩（Johanna），她給的一定不是大家心目中的標準答案。聽到問題後，Johanna抓抓頭髮，想了想說：「對我嚟講嚟緊興乜，就係興做自己。我舉個例，就好似超短裙，都唔係人人啱着，唔通成六、七十歲都着咩，都唔係嗰回事啦！又好似豹紋，其實季季都興，同一對鞋一件衫已經冇分別。」
十年前已着低襠褲
不談來季興乜，Johanna反而想講將會被out item，她說：「膊頭設計依然重要，不過，唔會係墊到好高好勁，低襠褲都會keep多陣，但唔會話好誇張。」話口未完，Johanna又推翻前言：「其實都冇所謂in & out，我十年前已經着緊低襠褲，第一條買嘅係Comme des Garcons，當年日本已經做緊，不過，歐洲方面冇pick up，所以先冇成為一個trend，其實最緊要都係着得舒服，啱自己啦！」
欣賞曼玉身材內涵
除了強調舒服、適合自己，對Johanna來說有一個字是十分重要，此字乃是：型！問她何謂「型」以及如何做到「型」，她侃侃而談：「『型』可以分為兩個層面，一半係發自內心，對自己有信心可以carry到件衫，另一半係外在，只要件衫嘅比例啱自己就會型，例如張曼玉，點解佢着衫咁有型，就算係着T-shirt牛仔褲都好型，因為佢有內涵之餘，仲有好靚嘅模特兒身材，當然大部分人都冇佢咁嘅骨架，咁惟有靠件衫去輔助，由件衫嘅剪裁去遮住自己嘅缺點。」
設計做到人人啱着
若然覺得Johanna的說話太玄，不夠實在，不妨看看由她設計的2010年秋冬女裝，或者從中可以得到一點啟示。
Johanna的設計一如她之前對「興乜」的闡釋，就是要做到人人啱着，她自言身為女性，最明白哪個位置想要遮掩哪個位置需要突出，她不得不說：「好多成功嘅男性設計師，好似McQueen同John Galliano嘅設計，雖然好靚，但係太誇張，一定要瘦到好似模特兒先着到。」
如果以more同less來區分，Johanna絕對屬於less一方，她說：「我細個好鍾意畫公仔，畫嘅都係小甜甜嗰種眼大大、着住好勁喱士裙嘅公仔，我媽咪見到就話你將來做設計師，唔好設計呢啲衫，如果唔係實嚇死人。就係咁，我講過我一定唔會設計咁多『叮叮dum dum』嘅衫。」就是這樣一錘定音。
給Johanna的2個問題
Q：你的啟蒙老師？
A：媽咪同婆婆。我好崇拜佢哋，佢哋都係愛靚之人，又係靚人。我公公嘅兩個細佬，都係同女明星結婚，其中一個就係尤敏。
Q：你的fashion icon？
A：Kate Moss（姬摩絲）同甘迺迪夫人積琪蓮。佢哋都好modern，永遠唔會out。
二手店執筍貨
毋庸置疑時裝設計師都是愛衫之人，Johanna亦不例外，家中儲了一大堆衫，不過，別以為盡是華衣美服，Johanna會告訴你，打開衣櫃，她形容撲面而來的是一陣臭味，因為她收藏的都是舊衫。
Johanna自13歲起在英國讀書，當地有不少flea market賣舊衫，她最常到Camden及Portobello尋寶，前者賣的衫平均售價幾英鎊，後者則幾十英鎊，Johanna執了不少筍貨。後來，Johanna在日本居住，當地也有不少上樓店賣舊衫，以她的說法當時是橫掃東京，她說：「日本嘅二手衫勝在尺碼細，啱我着，外國賣嘅尺碼太大，買咗返嚟要改衫。」
對Johanna來說每件衫都獨一無二，因為背後都有它的故事，它的每道摺痕，發舊的顏色，每個破洞，都賦予它鮮明的性格。
採訪：陳嘉敏 攝影：黃叔榮