重裝GFF獨角獸19件武器上身

等了又等，《機動戰士Gundam Unicorn》OVA半年先出一集，認真吊Fans癮，不過見主角機獨角獸高達又識透光變形又玩新類型人，有齊毒男至愛元素，相信動畫拖多兩年都大把人追捧。呢段時間Bandai當然會力谷新系列模型，剛抵港就有最強形態的Gundam Fix Figuation系列Full Armor Unicorn Gundam，全副武裝十幾支炮掛晒上身，勁過Rambo，睇嚟各位荷包又會再受重創。

售價：$719

Full Armor Mode 武器多過人

Gundam Fix Figuation系列年初出咗隻Metal Composite獨角獸高達，一度賣到斷晒巿，皆因佢跟足動畫識由Unicorn變成Destroy Mode透出紅色骨架。相隔半年新模型改玩Full Armor全武裝形態，骨架竟然由紅變綠，最攞命係全身手腳背脊裝滿晒武器，有火箭炮、機關槍、榴彈炮、盾牌及激光劍等，淨係換武器都有排玩，後面仲加多兩支火箭推進器，成支艦隊都唔夠佢打。

Katoki監修擺甫士一流

由於機身以1:144細比例設計，所以今次GFF全武裝獨角獸高達唔能夠變身，價錢亦比Metal Composite版平近半，日本官方定價8,400日圓，來到香港行貨賣$719都算合理，最重要是刪減變身設計後，令手腳、腰部、足踝等關節靈活性大大提升；加上由殿堂級大師Katoki監修出品，修長線條造型配合精密頭雕細節，令玩具宛如動畫般活現眼前，邊睇OVA邊擺甫士可說是一大享受。

兩把激光劍除了可手持玩雙劍流外，還可由前臂射出。	火箭炮可掛在背脊或拆下來雙手拎住，擺甫士型到爆燈。	背部加兩支火箭推進器，在最後一戰時以Full Armor對抗敵人。
拆除裝甲後，獨角獸高達顯得特別修長，滿有Katoki作品的格調。	外露骨架由紅轉綠，透光度不俗，可惜唔能夠變身Unicorn Mode。	手部和盾牌等細微位，都印有Unicorn個嘜頭，設計相當精細。