唔識潮流的潮人杜如風風行瘋買

記得有句說話「路係人行出來嘅」，但杜如風（Helen）就話「時裝係我行番嚟嘅」。跟近年被列入潮人之一的旅遊節目主持Helen談時裝經，她會偶然爆句「來季會興黯然銷魂灰」又或者「我鍾意鏗鏘集眼鏡」，有fashion sense得來夠爆笑，看來黃偉文後繼有人了。

Helen最愛這款購自巴黎的Parcel 70年代古董太陽眼鏡，講咗價都要550歐元。

旅遊節目主持兼作家杜如風被各大報章及雜誌都歸類為潮人，不過，Helen一句說話就將所有人都推翻，她哈哈笑說：「我真係唔識潮流，好多人問我興乜，又話乜乜乜又興番喎，我會反問一句『乜原來乜乜乜曾經out過呀？』」話雖如此，但訪問當日Helen以墊膊衫加低襠褲到場，話唔潮，呃人咩？或者大家對潮人定義有所不同，問她誰是潮人？請舉例以說明之。Helen不假思索就說：「Wyman（黃偉文）同阿徐（徐濠縈）囉！我好欣賞佢哋嘅風格。佢哋唔係跟住潮流走，而係創造潮流，好多人都會跟住佢哋嘅打扮走，咁就係潮喇！尤其Wyman對我影響好深，佢可以話係一本時裝嘅百科全書，問佢一樣嘢，可以講番十樣嘢畀你知。」

充滿vintage況味的手袋及帽子。

心水品牌推介

雖非潮人，但Helen對時裝自有一套學問，問她來季興甚麼，她也說得頭頭是道，但她先旨聲明全屬個人意見及感覺，她舉例說：「首先係低襠褲同重視膊頭嘅上衣。第二係幼腰帶，因為粗腰帶已經興咗一段時間，所以我feel到將會興幼腰帶。第三係黯然銷魂灰，來季將會興灰多過黑，所以今個秋冬我已經入咗好多灰色貨。」

至於心水品牌，Helen提供的都不是大路牌子，請記下以下名字：柏林的Bless、日本的Cosmic Wonder及Toga、英國的Swash，Helen尤其大力推銷Toga：「佢嘅detail好靚，簡單得嚟又會有啲嘢睇，最緊要係唔太誇張，冇乜signature，唔會話興完一季就唔可以再着。呢個品牌我已經鍾意咗三、四年，當年係我去日本原宿行行吓見到就鍾意咗，其實喺日本唔係好hit，當年香港都未有得賣，不過依家Joyce（時裝店）已經有得賣喇！」接着她不忘補充說：「我着緊呢件衫都係呢個品牌。」

杜如風與黃偉文、徐濠縈捧著名時裝設計師Jeremy Scott場。

最愛捐窿捐罅

Helen絕對是「讀萬卷書不如行萬里路」主義的奉行者，正如她所說時裝知識不是靠刨雜誌，而是靠自己「行番嚟」，她坦言：「我好懶睇雜誌，我亦唔係追品牌嘅人，見到鍾意嘅衫就會買，唔會理係咩品牌，好多時我都係靠對腳行番嚟。我去到唔同地方都會捐窿捐罅周圍行，發掘一啲舖頭仔。」說罷，剛去完巴黎的她又忍不住要推介：「巴黎第四區，75004，有好多小舖頭，好好行。」

Helen不只掃新貨，對古着、二手衫同樣照殺可也，足迹遍及香港、日本及巴黎，她如數家珍地說：「細個我會去香港嘅美芝（專賣二手的時裝店）買衫，我曾經喺日本住過兩年，當地好多賣古着嘅舖頭，我最鍾意買vintage tee，因為好平，千幾日圓一件，仲要係獨一無二。去巴黎就買喱士，仲要係維多利亞時代嗰種，不過買咗返嚟唔敢着，因為怕勾爛。」

有大水喉照住

對時裝的執着與熱愛，Helen笑言自出娘胎就如此，問她是否受家人的潛移默化？她即時劃清界線：「我屋企人同時裝係完全無關，我細個已經好貪靚，好鍾意買衫，我媽咪好憎我，鬧到我飛起，佢尤其唔鍾意我買二手衫，我買一件佢丟一件，又話都唔知乜嘢人着過，會唔會惹到鬼。」雖然得不到家人精神上支持，但最重要是金錢上全力支持，自言經常買衫買到碌爆卡的Helen，讀書時根本無需要兼職賺錢買衫，她老實說：「因為我屋企人負擔得到嘛！」有大水喉照住，難怪可以風行瘋買。

這款帽子造型頭箍，購自網上，才數十元。	維多利亞時代的喱士長圍巾，捨不得用。	首飾，Helen形容似新年用來舞獅的道具。
Helen預言幼腰帶將會回歸。這是出自她勁推介的品牌Toga。	奈良美智限量版全盒，於05年購自東京原宿。Helen買完這個全盒後，即時染了一頭橙髮應景。	Camilla Skovgaard高跟鞋。
Jeffrey Campbell高跟鞋，約一千元。Helen向喜歡穿高跟鞋而又要追巴士的女士們強烈推介。	購自中國北京長城的帽，四十多元人民幣有交易。

巴黎掃古董超

提到收藏，不少女士們都愛買高跟鞋，但Helen偏愛太陽眼鏡，她不禁說了句：「好在我唔鍾意高踭鞋，唔係唔得掂。」但喜歡太陽眼鏡的她，也不是很掂，就數最近她在巴黎掃了多副古董太陽眼鏡，其中一副已盛惠550歐元，她也自嘲：「我真係好蠢，點解我唔係儲手錶，手錶就可以保值啦！」問她為何愛儲太陽眼鏡，她答得出奇：「我都唔知點解，我又唔係成日戴，我起身嘅時候同太陽已經無關係，哈哈！」之後，她認真想了想說：「可能因為我係濕疹底，唔可以戴飾物，戴咗會起粒粒，戴太陽眼鏡就唔會敏感，可能係呢個原因啦！」

Maison Martin Margiela經典太陽眼鏡，Helen形容為「鏗鏘集」眼鏡，皆因受訪者戴了它，不用打格仔。	Super Luciano太陽眼鏡。	Cutler and Gross 70年代古董太陽眼鏡，購自巴黎，價值300多歐元。
Ted Lapidus 70年代古董太陽眼鏡，購自巴黎，價值300歐元。