Eee PC VX6 $7,000有找揸林寶

「轟！轟！」開着Eee PC新一代VX6筆記簿，竟聽到林寶堅尼跑車獨有的引擎咆哮聲，逼真程度嚇人一跳，原來新機與狂牛辣跑玩Crossover之餘，連喇叭都引入B&O ICEpower設計，流線纖薄外形配襯高級音響內櫳，用來玩《Need for Speed》賽車或睇《生死時速》等電影肯定更加投入，最吸引是$6,998就有部林寶揸上手，真車換套音響都唔止呢個價。

售價：$6,998

ION2雙核平台流線型跑車

ASUS自VX1筆記簿便與Lamborghini合作，多年來走高檔大機路線，冇番萬幾二萬銀都唔使旨意落樓，來到VX6竟轉攻Eee PC流動玩家，12.1吋流線外形概念沿自Murciélago LP640 Roadster跑車，無論鯊魚鰓氣孔或防滑膠粒都充滿辣跑感，連原本ASUS嘜頭都變埋狂牛徽章，配上6-Cell電池只重1.5kg，淨係輕量化外形已贏人哋幾條街。內裏更首次採用Atom D525雙核處理器配ION2平台，利用NVIDIA Optimus顯示技術令效能與慳電取得平衡，有外又有內，帶出街肯定引死女。

B&O ICEpower 引擎轟轟聲

用家使用時更能體驗VX6與別不同，除了開機便聽到「轟！轟！」引擎咆哮，由於左右各換上B&O ICEpower單元，播放高清片更可感受到清澈的高中音和具穿透力的低音效果，還可按個人喜好以Eee Splendid強化畫面色彩，迎合高清影音玩家需求。只不過很多人怕《Windows 7》開機等太耐，所以VX6引入Dual OS系統，只需按一下機面快捷鍵，即可登入《Express Gate Cloud》上網、睇相和玩遊戲，由靜止至全速起動大約7秒就搞掂。

鉸位流線外形似足跑車咁款，機背仲附有Lamborghini狂牛嘜頭。

多點觸控Touchpad設計，幾隻手指便可捲動網頁及放大縮小相片。

USB熄機充電配套功能強

雖然以NetBook定位來看，VX6近七千元定價實在貴人哋成倍，但憑藉辣跑效能和高級音響設計，總算一分錢一分貨，最正連周邊都融入強勁規格，內置兩個USB 3.0及HDMI插頭，還可在熄機狀態下，經USB替iPhone和MP3裝置等充電，將筆記簿變成流動充電器。軟件配套方面，更預載Eee Docking工具列，一按ASUS@Vibe下載影音及遊戲、Web Storage存取500GB網絡硬碟、YouCam視像鏡頭分享等，帶出街玩6個鐘都冇問題。