N8強橫影音即Kill iPhone

自iPhone大賣後，部部手機都爭做iPhone Killer，但大多都係有頭威冇尾勢，最後消失於機海之中。咁莫非真係冇機威脅到其地位？其他機唔敢講，Nokia將於9月中推出的旗艦機N8一定得，事關佢內置1,200萬像素鏡頭、720p錄影、Dolby 5.1音效同HDMI輸出，處處針對住iPhone嚟打，最正係佢可以直駁ontv睇新聞，唔似iPhone連Flash都睇唔到！

售價︰待定

微曲機背一體成形

N Series係Nokia主打戰線，設計大多Sell成熟穩重，但為打入年輕人市場，今次N8就玩大膽用色，除了銀、黑兩色，還有綠、橙、藍3隻Sharp爆顏色，論搶眼度純黑iPhone 4根本冇得比。設計上，它採用Nokia最擅長的直板機身，外框為磨沙鋁金屬，而且機背微微彎曲，有手感之餘，仲只有135g重，單手煲粥都唔覺攰。屏幕則為3.5吋大，Smartphone來說唔算誇張，但由於採用了AMOLED及電容式技術，所以色澤明亮得嚟仲玩到Multi-touch。惟奇怪的是，今次N8為了收身，機身竟然係一體成形，即冇得自行換電，SIM卡都要從機側插入，Fans們要時間適應。

Symbian^3首頁同S60 v5.0好似，兩者都可放6排Widgets，不過前者左右加埋有3版，兼且版版不同Wallpaper都得。	提供5色機身，9月中首賣時會先推綠、銀、黑，稍後才追加橙同藍。	一體化設計將SIM卡及microSD卡槽移至機側，換卡更方便。只可惜每次換SIM卡都要重新開機。
全機操作依賴3.5吋屏幕，因此機面只有一個Menu按鍵，長按可進入Multi-tasking頁面。

1,200萬像素鏡頭高清輸出

鏡頭方面，Nokia不嬲唔鬥像素，800萬像素已經停留一段時間，因此N8另一叫人驚喜之處，就係像素升呢到1,200萬，而且係蔡司鏡頭，支援28mm廣角、f/2.8大光圈及自動對焦，配合埋Xenon閃光燈，同廠影相佢至勁！iPhone 4拍到720p@30fps高清片，N8都拍到每秒25格，拍完仲可以剪接、加字幕及過場特效。另外，要讚佢有埋HDMI介面，可把短片直駁大電視欣賞，若短片支援5.1聲道，睇嗰陣仲可以聽埋Dolby Digtial Plus 5.1環繞音效，聲畫都咁勁，iPhone點追呀？

內置1,200萬像素蔡司鏡，並加入Xenon閃燈，相片成像補光都有保證。

試播《TRON》720p預告片，經HDMI輸出到大電視，效果仍相當流暢，兼且可聽到5.1聲道環繞音效。

試播《TRON》720p預告片，經HDMI輸出到大電視，效果仍相當流暢，兼且可聽到5.1聲道環繞音效。

Symbian^3改善了多工作業的頁面，如今不只Icon，更可顯示程式「全相」。

Symbian^3改善了多工作業的頁面，如今不只Icon，更可顯示程式「全相」。

升級系統直播ontv

依家講起智能系統，唔係Android就係iOS，但唔好忘記Nokia都有個Symbian，今次N8就採用全新Symbian^3，齋睇外觀同舊式S60 v5.0系統相若，主頁都有個「6舊腹肌」式Widgets列，但桌面總數就加至3版，而且版版可設定唔同Wallpaper，向橫一撥就極速變臉。新系統在多方面均作出改善，好似睇相時預覽圖彈出更快，播歌又有類似Cover Flow嘅Flick Scroll頁面，方便用家揀歌仔。另外，新系統還提供網絡電視台服務，除預載了CNN、National Geographic等頻道外，香港版仲睇到ontv新聞，夠晒地道！