希魔德軍 矮仔上身

演技更勝畢佬

Christoph Waltz於戲中飾演一名叫Landa的納粹軍官，機警狡猾又深藏不露，舉手投足都叫人心寒，其精湛演技，令畢彼特喺佢面前猶如剛剛畢業嘅小演員。Hot Toys早前取得電影版權，頭炮當然係畢佬演嘅Lt. Aldo Raine，可惜受肖像權所限，很多人都話頭雕過於「木獨」，少了一份戲中的鬼馬神髓。比較起來，Christoph對自己個樣就睇得冇咁緊，亦給予頭雕師Jeon Young Tae更多發揮機會，加上有JC. Hong上色及Kojun監修，已予人信心保證。

特製矮身Body

單看首辦，無論軟膠頭髮、臉形或額上火車軌都相當神似，深邃眼神亦給予玩家一種神秘感。若硬要挑骨頭的話，就是Christoph左邊嘴角是微微向上翹的，如今Hot Toys為求對稱卻把此特徵執走，追求Human-being的驗屍官一定又會狂鬧。相反Hot Toys對身形就較為執着，例如Christoph真人較矮小，廠商就索性為他重塑一款矮身Body，身高只有29.5cm，比正常Body矮0.5cm左右，穿上軍服係冇咁型，但卻還原了角色真貌。

韓籍大師Jeon Young Tae操刀的頭雕頗為神似，但若送埋個奸笑Look就更完美。

戲中Christoph係駐法黨衞軍，歷史有根有據，有助廠商把戲服及勳章還原出來。

配件見心思

講到軍服，Christoph大部分場景都以納粹德軍Look示人，這對出開軍事Figure的Hot Toys可說全冇難度，當中其駐法黨衞軍服就忠實還原出來，而且貼身得來有少許虛位，即使擺開槍Pose亦靈活自如。另外，衣領及心口袋亦跟足電影縫上不同勳章，並有齊軍帽、皮帶、人造皮軍靴及黑色大衣等Parts，設計一絲不苟。配件方面佢就唔算多，但處處見心思，除了公事包及手套外，還有一把魯格短槍及大煙斗，當中兩隻可換手掌便正是為手持以上配件而製，認真成咁，其他玩具廠點跟呀？

仿皮軍靴可整對拆走，方便玩家套用到其他Figure上。	送一把魯格短槍，可插於腰間的槍袋裏。	採用29.5cm矮身Body，穿上黑色大衣後更覺矮小。

撰文︰陳志滔　攝影︰胡淑儀　查詢電話︰2388 4677

另送手套一對，可惜戴唔落，只能拎在掌心中。	武器唔多，其他配件卻見心思。	送大煙斗一個，其中一隻手掌正為拎住佢而設。