雷頌德時裝愛美麗

由金牌監製變身時裝設計師，「COOLDAY,SIR」是雷頌德（Mark）闖入時裝界的首個代表作，清一色主打男士服裝，一種preppy look校園風的包邊西裝褸，格仔formal恤衫全屬阿Mark最愛的穿衣trad.look，而阿Mark實行將個人trad.「大眾化」：「我設計概念係由自己鍾意嘅款式出發，然後點樣將自己鍾意嘅素材，令到人哋都鍾意！」

雷頌德將個人扮靚心得設計時裝，希望將之普及化。

阿Mark認為設計時裝等同創作音樂：「音樂上面我都有自己鍾意一套，但都唔可能100%將自己鍾意嘅放晒落去，當一樣嘢變成商品時候，需要企喺買家嘅心態去諗。」然而經過日積月累對時裝的喜愛，亦作為阿Mark的靈感來源：「十幾年嚟啲靈感都未用過，依家可以大派用場嘞！」

恤衫配襯slim cut牛仔褲是阿Mark的最愛配搭，而來季的秋冬時裝，身為「粉絲」的阿Mark當然是推介Burberry Prorsum、Junya Watanabe。而阿Mark亦相信military look（軍裝）再會大行其道。至於阿Mark的心目中經典品牌，則首選曾任Gucci設計師的Tom Ford，他建立出新的經典男士服裝，而Junya Watanabe為男士服飾給予新生命，注入很多有趣元素。當然少不了大家熟悉的Ralph Lauren這個經典品牌，他不只是成功的時裝設計大師，更是為別人帶來夢想的時尚設計師。

Mark有獨特個人時裝理念。

力不到不為財

一向以音樂維生的阿Mark，今次「撈過界」兼顧時裝生意，令原本有限的睡覺時間更有限，但阿Mark深明做生意「力不到不為財」的道理，阿Mark謂：「唔會用自己個名玩玩吓，會keep住自己設計，唔會只得頭炮。」創立個人品牌，Mark承認面對壓力很大，因不想影響其他工作要適當分配時間：「以前喺錄音室，會利用等歌手嚟嘅少少時間休息吓，依家連呢啲hea嘅時間都諗設計嘅嘢！」

Mark陪蘇永康領取傑出衣着獎。

為是非唔攞獎

「十大最傑出衣着人士」是不少藝人渴望得到的獎項，代表衣着打扮有個人風格，是時裝潮流的icon。不過，當年阿Mark不滿評審團的是是非非，竟然「有獎唔去攞」，全因當年盛傳郭富城與大會鬧糾紛，評審團才將獎項給阿Mark。對於十多年前是非，阿Mark早已記憶模糊：「都唔記得咩事囉，好似係唔知乜嘢八卦新聞出咗，都唔記得Aunt講過乜囉，最後係我唔要呢個獎嘅，咁耐唔記得啦！」阿Mark自己獲獎不去，但09年好友蘇永康獲「十」獎，阿Mark竟肯陪太子讀書：「我係有陪佢去呀，阿康佢攞呢個獎好開心，開心到好似人哋攞金曲金獎咁，成班損友一齊去賀佢攞獎，佢感動到流晒眼淚。」

亦有失手時候

愛靚愛型的阿Mark亦有失手時：「點都有，不過就唔係大出錯，係自己覺得唔夠完美，我睇番一集《超級巨聲》裏面，我套衫嘅顏色喺好強嘅燈光下淺咗，喺屋企照鏡冇問題，但錄影廠啲燈射住就出事，人哋唔覺有事，係過唔到自己嗰關，仲會好留意嗰排身形，免得着錯衫暴露缺點。」而阿Mark會謹守出鏡的服飾不會重複，就算再穿同一件衫配襯亦不能一樣，他笑言：「着過邊件，點樣襯過，我都記得晒，我真係幾鬼無聊架！」

雷頌德將愛子雷鳴打扮成兒童版Mark。

禁兒做潮童

阿Mark愛打扮，兒子會成為時下「潮童」？阿Mark抗拒說：「唔會啦，老婆唔會畀咁做，我性格鍾意靚嘢，成日嘥錢買靚嘢，老婆就最憎我呢樣嘢，所以佢唔會畀呢啲事發生喺個仔身上，個仔只要做『得意童、乖童』就得，唔使做潮童。等佢自己大個搵到錢先買名牌，我都係搵到錢先買貴嘢。」

雷頌德首個代表作，清一色男裝。

製作過程嚴謹

對於自己的服裝品牌，阿Mark製作特別嚴謹，每套西裝一針一線都是由裁縫handmade精製而成，cutting靚的高質素剪裁，formal式經典恤衫，特別找廠商做封壓領，每個細節都製作認真。而首季collection，包括西裝褸、恤衫、西褲全是男士衣櫃中必備之選，阿Mark刻意選擇較柔和的藍、白、灰及杏色調，藉以簡單的色系容易讓人接受。

至於強烈顏色的愛好者，阿Mark表示就要留意其冬季系列，紅、橙、黃、綠、青、藍、紫再配搭素色調，因大多數人認為冬裝偏向較深沉顏色，而冬天會穿上多過一件衣服，以鮮色撞上素色凸顯出layer效果。除繼續不變的formal西裝系列，會推出casual wear照顧不同男士需要。為了解現今顧客購買心態，阿Mark會落舖視察民情，遇到識貨客人當然傾多兩句：「見過一個客人成套西裝，睇得出佢係花過心思，好似遇到啲志同道合嘅人，大家講吓衫經已好有滿足感。」

型男潮女逐個Mark
陳慧琳可塑性高

「靚樣配靚身形，可塑性極高，Kelly（陳慧琳）亦善於配襯之道，配搭得來屬大膽一類，可以將很多不同style的款式同時穿上身，但效果出乎意料的好；除了服飾上愛玩多重配搭，她屋企擺設同樣多樣化，林林總總放到一屋都是，但擺放得宜沒有雜亂感，反而變得很恰配，就與她着衫的道理如出一轍。」

黎明愛Versace

「屬於身形高大、骨架好一類，穿西裝最是煞食，記得早期Leon（黎明）令我最深刻印象是愛穿Versace，當年Versace最hit是大彩圖的花恤衫，但Leon唯獨鍾情該品牌西裝，因他清楚最適合自己的服飾，不是盲目去趕潮流。若然着衫扮靚對某些人是一種情趣的話，Leon給我覺得沒有這種買衫襯衫的情趣。試過和Leon放假到日本吃喝玩樂shopping，行完一間時裝店，買一大堆衫，就完成了他shopping目的。婚後的Leon，我知道他太太樂基兒在服裝上都給『不少意見』，他都樂於接受。」

陳慧琳

黎明

蘇永康獨有風格

「對時裝有研究，康仔認第二，我就不敢認第一，因康仔視時裝如生命，論貪靚度，康仔比我嚴重得多，他已有自己的穿衣風格，勇於大膽配襯，但又恰如其分，絕對不會令人有種標奇立異的感覺。講到做時裝生意，康仔未必會羨慕我，佢純粹享受着衫扮靚呢種興趣，而將興趣變成生意就兩回事，因為佢覺得自己時裝嘅喜好，未必街外人都會鍾意。」