師傅到！葉問教打木人樁

撰文︰陳志滔 攝影︰譚建章

查詢電話︰2332 3615

最頂癮配件要數呢把雞毛掃，細細把用嚟掃電話芒都得。	功夫衫唔係魔術貼，而係好似真衫咁用綁繩繫上，換裝時要花啲心機。	黑色唐裝長衫第一集成日着，白色功夫衫則於續集曝光最多，依家送齊兩套，想要邊集造型都得啦！

丹爺一Take Pass

Enterbay向來主打香港及亞洲電影人物，旗下李小龍系列一直叫好叫座，只不過出親都係龍哥，Fans難免叫悶；碰啱《葉問》大熱，正好食住條水為1/6 Real Masterpiece增添新成員。官方表示，整個Figure由開發到完成期用了8個月之久，丹爺由頭到尾都參與其中，因此與其說是葉問Figure，不如說是甄子丹Figure。完成品所見，無論眼神、面形及多層軟膠頭都跟足電影設計，而戲中從容不迫的神態亦充分表現出來，如此神似，難怪「宇宙最好打」審批時一Take Pass！

腳掌設有磁石，唔用托架都可牢牢站於地台上。

跟盒附送木人樁、4對可換詠春手及雞毛掃一把。

新素體更靈活

頭雕完成，再落嚟就決定生產咩配件，綜合電影公司及玩家意見，廠商決定製作4對可換手掌，手形跟足詠春拳來設計，因此可造出小念頭、尋橋等動作。而為展現拳腳並用的詠春拳，Body方面亦重新設計，可動關節比舊式ABS素體多，因此要擺上下路動作都唔成問題。另外，打詠春少不了木人樁，廠商索性以此為地台，底部鐵片印滿佛山大宅的地板圖案，兼送雞毛掃一把，正好重現怒打金山找一幕。其他配件還包括黑白唐裝衫及詠春套路，後者好比「出招表」，跟住擺甫士，Figure自然更傳神。