婷婷愛在心中不怕老

來自星級家庭的謝婷婷，最近成為Estee Lauder的Star Icon，但在她心目中的Star Icon卻是縱橫影壇數十年的父親謝賢。「就算我唔係佢個女，喺街見到謝賢都知佢係星，言行都有天生明星風範。老竇話有次行街，有班日本女仔走埋去同佢影相，但人哋其實根本唔知佢係星。平時我打扮比較隨便，所以佢成日攞呢個例子，叫我要camera ready。」

婷婷笑言不愛打扮到「成隻雀咁」，但自小已坐在母親旁看如何扮靚，除大讚母親化妝技術超群，更透露以前會剪報累積扮靚心得：「真係儲落唔少化妝髮型嘅報道，不過有一本化妝嘅資料簿唔見咗，都好可惜。我冇諗過出美容書，因為我嘅心得都係聽人哋講，我唔想咁樣賺人哋嘅功勞。」

驚覺言行影響大

入行兩年的婷婷，自言最大變化，是現在願意理解他人的想法。「依家我覺得我係一個role model，言行好影響大眾。記得未入行前，喺街見到一個三、四歲嘅小妹妹，佢竟然叫得出我個名！呢件事好影響我，自己嘅言行會好影響其他人嘅諗法同成長。好似我崇拜偶像，都會因為佢而受影響。」婷婷說兩年來生活上的改變，是比前較少出外：「可能我已經過咗去玩嘅階段，以前出去陪吓朋友，期間傾吓嘢睇吓有冇工作介紹；依家生活踏實好多，每日都有嘢做。」

每當談起男友安志杰，婷婷都會不期然展開甜蜜的笑容。「我以前冇諗過會識到一個人會做到自己嘅partner，睇《灰姑娘》同《美人魚》呢類童話故事會好開心，但我冇諗過自己都可以一樣咁開心。有時，我會反問點解自己咁幸福，係咪發緊夢？我覺得唔單止愛情，屋企人都係咁好。有時我都想深入啲同父母傾偈，不過始終都有啲代溝，哈！」

深信鐵柱磨成針

九月便是婷婷的廿七歲生日，三十歲關口將至，但婷婷說從來不怕老：「近來朋友同我傾開，話年紀大好多嘢做唔到，例如做一字馬或彈琴，但我覺得，只要你每日做伸展運動，一定會做到一字馬；彈琴更加係八十歲都學到。外表都一樣，只要持之以恒去每日護膚，一定有效果。而且，年紀愈來愈大，代表你所得嘅經驗愈來愈多，呢啲係好寶貴同無價。」

內在美勝外在美

問愛美的婷婷是否不怕容貌上留有歲月的痕迹？她想也不想便說：「如果我有Andy（安志杰），我真係唔會怕。一開始我認識Andy時，真係覺得佢好靚仔，慢慢就發覺佢內心嘅美，令佢更加靚。我識一啲男性朋友真係好靚仔，但內心好核突，連望多一眼都唔想。」

情人眼裏出西施，婷婷看到安志杰的好，不是因為愛情：「佢係好傳統顧家嘅男人，咩都為我做到最好。食嘢會畀最好嗰舊畀我食；行斜路會畀我行最平嘅一邊；返到屋企佢見我辛苦會煮好晒飯我食。大家從來冇刻意話邊個輪流做家務，當我想做時都已經畀佢做晒。」婷婷承認已視安志杰為另一半，亦不時討論婚事：「就連打機時都會講到結婚，但大家講講吓就唔知講咗去邊，可能大家係indecisive嘅人，可能最後係大家嘅父母真係去問先落實（結婚），但點都好，依家真係同結婚冇分別，因為我好肯定已搵到一個soul mate。」

美麗三秘訣

婷婷笑言不愛打扮，但自小愛看母親拉姑如何扮靚：「媽咪左右手一齊化妝，我學都學唔切，佢好叻點運用顏色，平時我只慣用earthy色眼影，但品牌推出Pure Color高清純色眼影就好啱我，好易襯。」她又稱近日拍戲必帶備三寶傍身：「因為好熱好曬，加上每日上妝補妝成十個鐘，所以Advanced Night Repair一定每日用，搽頸搽面同心口。以前會懶，係咁意搽就算，依家日日用，好明顯就連頸紋都少咗好多。」另一寶，就是Pure Color的Lip Gloss，貪其不會「立黐黐」；最後一寶，就是Estee Lauder的Mascara：「處女座嘅我好講求完美，以前用嘅Mascara搞到啲睫毛一舊舊，要用牙籤逐條挑，試過呢個品牌之後就唔使。」

婷婷對Estee Lauder的Pure Color系列甚為推崇。

放大圖片

明星二代戰績輝煌

不少明星第二代均踏足演藝界，要青出於藍，箇中壓力非外間所理解，但莫論成績好壞，已令這圈百花齊放。先談星級幕後，黃百鳴兒子黃子桓為《葉問》編劇，更令《葉》片獲金像獎「最佳電影」殊榮。成龍兒子房祖名電影唱片雙線發展；母親為昔日粵語片女星的馮德倫，身兼演員及導演兩職；曾志偉一對子女曾寶儀和曾國祥分別為頂尖主持人及電影幕後人員。

採訪：Winnie Choi

攝影：Marco Shum

服裝：Craver

髮型：Ray Chan

化妝：Kamen Leung

場地：Crowne Plaza Hong Kong Causeway Bay