高‧獸‧平

Body高2吋

若果說李小龍系列係Enterbay台柱，咁Preadator喺Hot Toys中亦擁有同等地位。雖然計埋半胸像、全身像及1/6 Figure，數量超過10款有多，但依然係最好賣、升值潛力最勁嘅一條MMS產品線。之不過出過咁多隻，粉絲總覺悶，難得新一集《鐵血戰士S》有4隻新血獸，正好為HT注入新概念。首先登場嘅係血獸隊長Berserker Predator，故事形容佢比元組血獸（Classic Predator）更兇悍、更高大，為此HT特別重塑一個全新14吋Body，比其他12吋Figure幾乎高一個頭，拍埋舊血獸身邊，一睇就知佢係大佬輩。

兩副大口夠野獸

買得血獸，唔樣衰唔收貨，拆下Berserker面罩後，就會露出其恐怖衰相。若嫌未夠兇殘，隨盒送兩副開合嘴形，套上後即見血盆大口，保證嚇親細路。據造型師Joseph Tsang表示，新血獸由設計首辦完成，足足用咗3個幾月，比舊血獸更花精神心血，因此出嚟嘅成品神似度極高。實物所見，無論雙眼、獠牙或其標誌Jacklock頭都極為像真，而且皮膚原來用人手逐筆雕出來，怪不得其蜥蜴紋理可以咁令人毛骨悚然。

左邊膊頭有Laser炮，仲識有限度擺動。	招牌Jacklock頭當然唔少得，這部分用軟膠製造。	Body足有14吋、35cm高，比一般12吋Figure大件，但留意關節只有22個，擺甫士要就住就住。
皮膚上嘅蜥蜴紋為人手逐筆雕上，Zoom埋啲睇真係超像真，難怪造型師話係最困難部分。	附送2副嘴形，抵讚係接合位隱藏得相當好，基本上很難發覺。	放大圖片

少配件靠平取勝

變大隻以外，Body設計亦跟以往不同，舊版血獸常將胸、腹分開處理，雖然靈活性提高，但就搞到關節外露相當突兀。有見及此，今次廠商特別把軟膠套在上身，將關節隱藏起嚟，整體嘅皮膚紋理自然更為統一。配件方面，舊血獸不嬲多嘢玩，相比起來今次就失色咗啲，除一對手掌及一副人類骸體以外，就只有三把手刀供替換，玩慣大推頭Parts嘅粉絲難免失望，亦因此售價比動漫節別注平一截。

右手可配手刀，不過唔似電影咁識得伸縮，長短要玩家自行更換。

新血獸好揪得，所以高科技武器欠奉，配件自然比較少。

零售價︰$1,280

預訂價︰$1,250

推出日期︰今年第4季

撰文︰陳志滔

攝影︰郭凱敏

查詢電話︰2388 4677