分女友資產LX5愈影愈龍

千呼萬喚始出來，講緊係Panasonic LX5，換上一支更實用嘅Leica DC Vario-Summicron 24~90mm鏡頭，再換埋動態範圍同飽和度更高嘅新CCD；而且設計上亦GF1化，白色機款似足「女友」，兼且分佢資產，用埋佢啲配件！

售價：$4,590

24~90mm Leica鏡頭

對比LX5跟上代LX3，發現兩者規格分別唔大，只係將快門速度提升到1/4,000秒，將感光值推高到ISO 12,800等幾項，不過數據係死物，用落就能發現LX5比LX3好用。比較顯著嘅升級，係LX5換上一支新Leica DC Vario-Summicron 24~90mm 3.8倍變焦鏡頭，比之前嘅24~60mm焦距鏡頭涵蓋面更大，Zoom近景物較方便，而且變焦夠順滑。這支新鏡頭以9組10片設計，內置3片非球面鏡，成像力高，而且在最廣角端光圈可達f/2.0，延續LX3嘅優點。

LX5（右）跟GF1都幾似，但就細一個碼。

最高感光度可達ISO 12,800。

轉用Power O.I.S.，防震能力更強。

新CCD提升畫質

雖然LX5仍然用1/1.63吋1,010萬像素CCD，表面上對比LX3冇任何改進，但其實這塊CCD採用新技術製造，透過改善微鏡片設計以加強集光能力，令動態範圍跟飽和度分別提升31%及38%，再配合全新Venus Engine FHD影像處理器高速減噪及增強影像邊緣線條，大大提升畫質表現。以LX5用上ISO 800感光度拍攝，相比採用同等感光值嘅LX3雜訊更少，可用性更高；但當然LX5的最高感光值ISO 12,800，除非在好極端嘅環境下，否則唔用好過。

LX5重新編排機背按鈕位置，並加入旋轉按鈕簡化揀選程序。

兩代LX系相機嘅機頂設計相似，LX5（上）就用上錄影掣取代對焦掣。

對焦速度快

LX5另一討人歡心嘅地方係改善對焦速度，同一環境及設定下，速度比LX3快近一倍；就算跟配備Pancake鏡頭嘅GF1比，兩者表現亦相當接近。此外，LX5在機身設計上，都有唔少地方向GF1學習，如機背加入旋轉按鈕，令揀選設定更順手；熱靴插座亦跟GF1相同，於是可接駁其煙斗形電子觀景器或光學觀景器，「龍」味十足。拍片方面，LX5採用AVCHD Lite格式，可以攝錄1,280×720解像度30fps影片。試玩期間，發覺操作幾順手，改良後手握位亦拎得舒服，但係定價$4,590，則比想像中略貴。