NEX換鏡DV親民價拍入屋

Sony早前加入Mirrorless換鏡相機行列，NEX雙鏡套裝仲一出就賣斷巿，估唔到這股換鏡浪潮捲到DV界，將於9月推出全球首部家庭式換鏡攝錄機NEX-VG10E，以後想用長炮Zoom遠景、淺景深營造氣氛，換支鏡頭就輕鬆搞掂，就算嬌滴滴的女仔都拎得起部機，拍出全高清專業效果，仲可同時影埋4,592×3,056高解像靚相，一機兩用更抵玩。

（預計9月中發售）

NEX換鏡DV夠親民

換鏡DV一直用於電視台、紀錄片製作等專業範疇，不過一台換鏡高清攝錄機動輒過十萬元，現在平民版NEX-VG10E終於誕生，以十分一價錢便可享受換鏡拍片樂趣。跟機配埋支E-Mount 18~200mm鏡頭（相當於27~300mm焦距），單係支鏡就賣99,750日圓，兌換後近九千港元，所以計落NEX-VG10E攝錄機都唔算貴。最正是用家可另購A-Mount轉接環用回Sony單反鏡頭，甚至換上副廠Mount接駁不同牌子鏡頭。

專業靚聲收音咪

新機沿用NEX系列的APS-C規格1,460萬像素CMOS，直接將鏡頭影像投射至感光元件上，令全機連鏡頭加埋只重1.3kg，帶出街長時間拍片都唔怕攰，只是裝支長炮上NEX-VG10E少不免有點頭重腳輕，鏡頭比機身更「墜手」。為此機頂特別改良手握設計，將手握位與巨型收音咪結合，令拍片就手之餘，Quad Capsule Spatial Array收音咪更可收集四個方位音源，有效捕捉主體聲音及減低噪音影響。

機頂改良的手握位，結合巨型四方位收音咪，揭開還可看到Hotshoe位方便加燈。	按Mode掣便可由拍片轉為影相模式，最高可拍攝4,592×3,056解像度靚相。	快速滑輪設在機旁，一轆就可調校光圈快門和操控設定，用來睇相播片都很方便。
儲存媒體除了Sony自家MS Pro Duo和MS Pro-HG Duo記憶卡外，還支援SD、SDHC及SDXC。	操控介面有點NEX影子，用滑輪便可調校拍攝模式、錄製格式、亮度色彩等。

快速滑輪調光圈

在操控方面，新機亦融合專業換鏡機與家庭式DV優點，想拍攝景深朦朧效果時，只要揀選手動對焦（MF）或半手動對焦（DMF），便可扭動鏡頭對焦環調校，配合魚眼鏡、廣角鏡等想幾「龍」都得。為了令操控更簡便，機身除了備有防震模式、手持夜拍等傻瓜功能，更加入快速滑輪，一轆就可調校光圈快門，甚至轉換色調和設定等，玩家創意便可盡情發揮。