冷血僱傭兵孖住精神病患者合作撈偏門，呢條橋在07年推出嘅《Kane & Lynch》遊戲證明係Work，遊戲大賣；甚至連荷里活依家都拍緊電影版，預期下年暑假開畫。言歸正傳，遊戲第二集《Kane & Lynch 2: Dog Days》將會在月底推出，暴力、血腥相應加碼，仲將遊戲舞台搬到上海，成街都見到中文招牌，玩落確有幾分親切感！
先旨聲明，呢套遊戲實屬「兒童不宜」，場面暴力血腥不特止，玩家仲要作奸犯科，接盡各種犯罪勾當，掃低黑幫外，有時都難免要傷害平民百姓，正義嘅玩家就最好唔好玩喇。今集遊戲舞台搬到上海，其實唔係暗示上海係罪惡溫床，而係證明呢個地方在世界舞台嘅重要性高咗，連搵亞洲風情江湖背景都揀到佢。故事講到Lynch同女友在上海過住安穩生活，點知有一日無意中捲入一宗軍火交易，迫於無奈下要搵埋Kane齊齊出山。
橋段雖然老套，但好有電影感嘅分鏡就爭回唔少分數，似睇緊一齣刺激火爆荷里活西片。上集視點固定，睇落呆板，今集就落重本，加入移動視點，亦會由第三身視點霎時轉換到第一身視點，令玩家更有犯罪嘅感覺；而當遇到生死存亡嘅驚險場面時，遊戲就會自動轉到慢動作顯示，並且切換到唔同視點，畀玩家可以立體地睇到當時嘅場面，電影感極強。遊戲內全是用拳頭或子彈執行嘅犯罪任務，下下開槍駁火多多都唔夠死，形勢比人差時其實可以選擇走佬，或隨時捉住身邊人做人肉擋箭牌，擋完子彈後就將人肉盾牌掟埋一邊，都幾變態。
玩射擊遊戲通常都要搵掩護，匿埋然後再伺機開槍；但係遊戲內任何物件都可以射爛，唔好以為匿在飯枱、屏風甚至柱後面會好安全，中多幾發子彈就冇，所以玩家要不斷搵遮擋。除咗單機犯案外，遊戲當然亦支援多人連線，玩兵捉賊、扮Kane及Lynch聯手犯案外，亦可以聯合各方犯罪分子執行各種任務，聯群結黨打劫銀行再諗計逃走；不過呢啲諗法只可以在遊戲入面出現，真實世界並唔容許。遊戲仲有冇其他「兒童不宜」嘅地方？執行非法任務通常都係夜深先出發，經過夜總會時有可能見到一絲不掛嘅女人，不過試玩版中會打格仔，正式版唔知會唔會解禁嘞！
類型：射擊
開發：Eidos
平台：Xbox 360、PC
推出日期：8月27日
售價：$299（Xbox 360）$280（PC）
查詢電話：2418 8896
撰文：布偉倫