純玩船P水上狂西Natural High
炎炎夏日，有咩開心過包船同一大班Friends出海開P。遊船河最緊要開心，最好玩到有咁High得咁High，不過坊間不少提供船河服務的遊艇公司，都只配備一蕉一Wake招呼大家，High極有個譜，難以滿足一班玩水精。添哥隻船就唔同，配備多款刺激水上玩意，包保Fing到個個Natural High。
多項玩意 逐步升級
在西貢碼頭上船，經過差不多1小時船程，來到大蛇灣。船未停定，添哥和拍檔阿成已為多款刺激的水上玩意，包括飛魚、飛氈、梳化床充好氣，快艇亦已Standby，兩位Model—無論識游水的Mangie或是不諳泳術的Jenny，亦一早做好Fing的準備。
左片右片 隨時翻床
第一項玩意是梳化床，比我屋企張床褥還要厚還要大，最多可以4個人一齊玩，坐、趴、瞓，甚至跪喺度玩都得。在選擇位置方面，建議兩個女仔坐中間，男仔坐左右兩邊，皆因兩側最要求手力亦最激。當快艇極速拖行然後不停轉向，梳化床便會在水上左「片」右「片」，上面的人則會左「西」右「西」。
添哥邊揸快艇邊笑騎騎咁話：「唔好以為佢咁大張唔會翻，『西』起來一樣會翻架！」呢頭講完，嗰頭張床真係翻咗，4男女個個跌晒落水。
梳化床
限玩人數：每次4人
Natural High指數：★★★★（5★為最高）
神奇飛氈 掟彎至High
下一個輪到隨時會Fing到你反轉的飛氈，是4款充氣玩意當中最「薄」的，頂多只有4吋厚，像一塊薄餅，唔似得梳化床咁有得挨，兼可以多人一齊玩。
玩的時候，建議俯臥其上，雙手緊握旁邊的手抽，做好隨時被Fing出氈的準備。Mangie和Jenny玩完齊齊讚不絕口，最High莫過於掟彎時，成個人快要西出氈，差點翻氈的一剎！對攝影師和我這位旁觀者來說，最High就是睇住佢哋翻氈跌落水，哈哈。
飛氈
限玩人數：每次3人
Natural High指數：★★★★★
炮彈飛人 極速飛行
終於來到超爆超High的炮彈飛人，為免兩位Model玩到個妝花晒，特別找來添哥的助手阿成和客人細明客串試玩。所謂炮彈飛人，是一個約1.2米高的充氣背心。玩過多次的阿成教路：「玩時成個人要像龜仙人一樣置身背心內，避免喪飲海水，然後雙手拉緊游繩，便可像炮彈飛人般，在水上極速飛行。」客人細明玩完激讚，感覺自己就像人肉炮彈一樣，當快艇轉彎，炮彈開始打橫飛，然後還在水中360。再360。再360。咁打轉，轉到你又暈又High。
炮彈飛人
限玩人數：每次1人
Natural High指數：★★★★★
純玩船P
上落船地點：西貢碼頭
時間：9:00am~5:00pm（日間8小時）
人數：20人或以下
收費：暑期旺季，平日$4,000起，星期六、日或公眾假期$7,500起。若超過20人每位收$150，套餐只包香蕉船和Wakeboard，若想玩多幾款水上玩意，需另加$1,500起（自選3款）。遊艇上另設電腦選曲卡拉OK和麻雀耍樂。（建議最好提早1星期預約）
查詢：9713 1595（阿添）
網址：www.waketim.com
撰文：林登麗 攝影：陳世昌
模特兒：Mangie及Jenny（Step Model）