拍住上 iPhone 4幫o靚模美肌
書展和動漫節剛完結，一眾o靚模Cosplay可謂出盡風頭。「乜話？掛住掃貨唔記得帶相機？」好彩iPhone 4行貨剛到手，500萬像素閃燈鏡頭加720p高清拍片，即場「單撈﹂影相Apps玩特效原來仲過癮，一於搵浸大咪神Carol、撕暴o靚模Debby、美女廚房阿雪、百果園DaDa等玩新Apps影靚相，為8月中的香港電腦節做熱身。
撰文：鍾鎮科 攝影：張群生、鍾鎮科
雙鏡頭加閃燈 自拍更就手
iPhone 4雖然屏幕Size同上代差唔多，但畫質就高4倍，連帶鏡頭像素都由300萬提升至500萬，最正是新增LED閃燈和前置鏡頭，多了好多Apps玩，好似《Mirror》就將前置鏡頭當鏡用，不過最方便始終是用來自拍，唔使反轉部機篤芒咁麻煩。
《o靚模影相篇》》》》》》
MoreBeaute 自動美肌
DC興玩美顏模式，估唔到iPhone都有得玩，仲要係免費App任單撈，原理是偵測人臉後將肌膚調白變光，就算o靚模入場前素顏畀你影到，都可以幫佢除去雀斑、換走暗啞膚色，保持雪白的女神形象。
ActionCam 四格連拍
好多人試過用iPhone玩LOMO和寶麗萊效果，但原來佢仲可以變身Toy Camera玩四格大頭相，只需安裝《ActionCam》便可利用手機作定時連拍，然後合成得意的多格照片，適合甫士多多的模特兒使用。
BlendCam 多重曝光
手機話就話冇得換鏡，但一樣可以影出單鏡反光機的多重曝光效果！日本TORI設計的《BlendCam》App可把多張菲林疊片，調校單色、亮度等合組成一張靚相，還可直接在疊片上再影相。
Hello Kitty Magic Photo 可愛魔法
想將iPhone變成貼紙相機的話，最近就有《Hello Kitty Magic Photo》讓用家影完相，加入可愛的Hello Kitty公仔，製成獨一無二的牆紙。雖然App供免費下載，但每次製作需付US$0.99。
《後期製作篇》》》》》》
PS Mobile 快速執相
影友平時影完相都會用《Photoshop》執番靚，但用iPhone影完通常即時上傳Facebook、Flickr，因此Adobe便推出簡化版《PS Mobile》，將主要的Crop相、光暗、銳化等功能融入iPhone，手指掃左右調校強弱。
TouchRetouch 抹走瑕疵
展場咁多人，影Model時很難避免將路人甲和雜物影埋入鏡，這時可用《TouchRetouch》捽走這些瑕疵，軟件會將附近的素材填補入去，按一個掣就搞掂。