塔門登山草地任碌

上山頂露營觀石

塔門又名草洲（Grass-Island），臨近西貢東郊野公園，位於大灘海、大赤門及大鵬灣之間。

數塔門必去的地方，必定是山頂的觀景亭，途中先經過天后廟，正所謂「入屋叫人，入廟拜神」，當然要先打個招呼，祈個福啦！天后廟建於清朝康熙年間，至今仍保存完整，在觀音誕時，附近漁民會專程來到塔門上香祈求平安，香火鼎盛。

沿廟旁小路上，地下有標明上山頂的指示，經過警崗後，約5分鐘就到達觀景亭。眼前是一片遼闊綠油油的草地，大到任你點打觔斗都冇問題，抬頭仰望，是久違了的藍天，這裏是俯瞰整個海灣的最佳位置，只見腳下是半月形的岩石堆，確是難得一見的自然景觀。到訪當日，發現不少人來露營，他們說在這裏睇日落日出都極之漂亮，晚上則換上滿天星宿，景色美得沒有話說。唔得，我下次都要來Camp一Camp！

夏日炎炎遊船河，清風送爽，正！	來到天后廟，當然要祈福。	既然是露營勝地，大家不妨帶個帳篷來住番晚。

嘗海鮮買乾貨

碼頭有不少居民開設的小攤檔，售賣蝦乾、魚乾、螺頭乾、花膠等，你想要乜乾就乜乾。除了乾貨，更發現自家製的柑桔蜜，呷一口冰凍又解渴；此外，貝殼製手工藝品都不錯，最愛那雞泡魚鎖匙扣！

逛完買完，係時候醫肚，大家可以到酒家嘗個海鮮餐，其中新漢記海鮮酒家有齊各款海鮮，包括清蒸大蝦、薑葱炒蟹、豉椒炒蜆、椒鹽魷魚，還有香噴噴的海膽炒飯，新鮮又惹味，想食豪啲，幾百蚊都可以食到隻鮑魚，你想鮑汁定薑葱蒸先？

喜歡手作仔的朋友，也可找到不少貝殼手工藝品。	碼頭有不少居民開設的小攤檔，至啱做手信。	這位嬸嬸自家製的柑桔蜜，生津解渴，$10支。
天時暑熱，食碗凍冰冰的薑汁豆腐花，一流，$10碗。	大蝦夠新鮮，清蒸已經很好味。

海下灣玻璃底船觀珊瑚、荔枝莊、塔門聯遊（不定期出發）

團費：$158（包海鮮午餐），另加領隊小費（每位$15）

查詢：2527 2513（翠華旅遊）

撰文：羅安琪

攝影：郭凱敏

模特兒：Man（Omni Model）、Carmen

鳴謝：翠華旅遊