靠華麗包裝同天馬行空設計上位嘅《戰國Basara》系列已經出到第三集，《戰國Basara 3》除加入唔少Visual系型人新武將之外，仲吸收咗FPS遊戲同動作遊戲嘅長處，好似武將打埋身戰時會使出格劍動作；二人協力對戰時，當同伴陣亡亦要趕去救援。配合埋設計更華麗嘅Basara技，喪打喪劈之餘都幾有新意！
《戰國Basara 3》故事圍繞住德川家康同繼承豐臣秀吉遺志嘅石田三成身上，講述西元1600年關原之戰後，兩人二分天下嘅大戰。本地大部分玩家對日本戰國時代嘅熟悉程度唔高，但遊戲入面都有唔少文字簡介話番畀大家聽，遊戲背景係日本戰國後期嘅古仔，打機可以學埋歷史。雖然故事背景有根有據，但武將角色造型同兵器等就天馬行空，正如石田三成一頭銀髮加緊身衫，走到今日嘅涉谷街頭都會覺得佢型；另外，新女角雜賀孫市更用上霰彈槍、機關槍攻擊，雙槍姿勢有幾分似Bayonetta。
今集除原有嘅固有技同必殺「Basara技」外，仲加入「戰刻Boost」新系統。當攻擊敵人或攻陷敵人陣地時，都會增加「戰刻Boost」能力值，儲滿後發動，身邊敵人就會慢半拍任你魚肉，感覺似動作遊戲中嘅「Bullet Time」，如果呢個時候發動「Basara技」更可以將身邊敵人全數殺清光。「戰刻Boost」亦可以在雙人協力時輪流發動，做出超高嘅Combo Hits，殺得爽快。
《戰國Basara 3》亦參考唔少FPS嘅玩法，二人協力時其中一個玩家陣亡後，另一個玩家要盡快走去救援，唔係就會Game Over。
如果兩個武將同時使出固有技埋身攻擊時，會進入「劍劇」模式，呢個時候要鬥快連打，撳贏就可以將敵人打暈。此外，《戰國Basara 3》嘅策略性亦有所提升，正如戰場上設有唔少機關，一唔小心觸發機關就會招致損傷；而新陣地系統方面，如果先攻破由敵方武將跟大量弓兵守衞嘅陣地，敵方士兵就會士氣低落地四散，可趁呢個時候一舉剿滅。值得一提係行貨只賣$299，以PS3遊戲嚟講實屬少見，而且再送多本中文說明書，抵買！
類型：動作
開發：Capcom
平台：PS3
推出日期：已推出
售價：$299
查詢電話：2359 7998
撰文：布偉倫