AC2大刺客玩轉文西武器

衣飾勁逼真

《AC2》場景設定於15世紀意大利，即文藝復興時期，無論服飾剪裁、花紋都與現今有很大分別，因此Figure廠少啲製衣功力都做唔到。為此HT找來大師Namgung Mijin出手，此君之前製作過「鉸剪手」，出名手工精細，今次亦沒有令玩家失望。頭笠連上衣用磨毛布裁剪而成，左邊護膊是人造皮，袖口有喱士花紋，加埋仿麖皮披肩，逼真得來夠晒Layer。而最正係頭笠剪裁剛剛好，唔會笠唔過頭或大到過晒龍，令角色嘅經典「笠頭」Look可忠實呈現。

護膊有壓紋、衫尾有花紋，連袖口都有喱士修飾，Detail成咁仲靚過真衫！	放大圖片	皮靴為啤膠，冇得拆出來畀其他Figure用。

三大師傅合作

頭雕係另一叫人驚喜嘅地方，因為小小一個頭雕，竟然請來GOX操刀、JC.Hong上色及Kojun監修，三位大師合作下，男主角Ezio個樣好難唔似。而為避免脫下頭笠時頭髮變得蓬鬆，這部分亦以軟膠代替植髮，設計見心思。素體方面，選用了連頸窄膊Body，之前大盜五佑衞門已經用過，特點係比正常Body纖瘦，即使着咗幾件衫，擺Pose仍靈活自如。

三大頂級大師合作，男主角Ezio無論面相、塗裝同髮型都勁似。	連頸窄膊Body瘦得來仲有30個關節，着咁多衫都依然瀟灑。	放大圖片

袖裏劍可換長短

主角仇家唔少，好彩有個好友達文西幫手設計武器。為免浪費文西一番心機，HT將長劍、短劍及6把飛刀都如實打造出來，當中暗殺兵器之首「袖裏劍」更有兩個長度任換，似足遊戲殺玩家於無形。美中不足係冇斧頭、狼牙棒等新武器，否則單是Parts都有排玩。跟其他VideoGame Masterpiece一樣，它亦附送地台及各式替換手掌，就算要擺空中滑翔Pose都唔係問題。

配件包括多對手掌及劍，小心飛刀細得滯容易唔見。	皮帶背後可插6把飛刀，型過小李飛刀。	袖裏劍唔似遊戲咁識得自動彈出，要玩家自行更換長度，唔夠好玩。

零售價︰$980

預訂價︰$950

推出日期︰今年第3季尾

撰文︰陳志滔

攝影︰盧展程

查詢電話︰2388 4677