本來曼谷劫後重生周圍大減價，值得過去行一轉，但早幾日又發生鬧市炸彈爆炸，都係睇定啲先。以短線遊嚟講，日本始終最受港人歡迎，雖然日圓匯率居高不下（徘徊8.8~9算），但一來路牌多用漢字，兼且交通方便又安全，幫部iPhone裝埋以下嘅實用Apps，自由行去日本冇難度！
撰文：布偉倫
《Japanese Audio Phrasebook》真人發聲
在旅遊購物區，講英文或者普通話有時用得着，但係去到偏遠少少嘅地區，唔識講番幾句日文都幾麻煩。「單撈」埋《Lonely Planet Japanese Audio Phrasebook》，可以在英文分類中搵出想講嘅句語，然後譯成日文字再真人發聲，去到田舍家都冇有怕。
平台：iPhone
下載費用：3.99美元
《東京地圖本完全版》帶你行街
雖然大家去東京嘅目的不離Shopping再Shopping，地點離不開新宿、銀座、原宿及涉谷，但如果想去少啲港人嘅地方，拎本電子版東京旅遊書就最實際。儘管《東京地圖本完全版》係全日文（Search Keyword：Tokyo Map），但小記覺得當地出嘅旅遊書編排得較好，而且可以知道當地口味。
平台：iPhone
下載費用：3.99美元
《食Log》醫肚掂
想在日本搵好嘢食，都係信日本地道推介好過香港的旅遊書。《食Log》係日本最大餐廳資料庫的iPhone App版本，做法同本地Openrice差唔多，詳列每間餐廳資料同評分。唔識路去的話，仲可以用埋GPS定位功能幫你搵路。但要留意，程式只得日文介面，而且要用GPS需另外畀錢。
平台：iPhone
下載費用：免費
《2010年花火大會Navi》
玩煙花
暑假期間去日本，一定唔可以錯過花火大會，少女們都會着上浴袍去參加。想知道每個地方花火大會的日期同地點，唔使走去便利店買《Tokyo Walker》，裝呢個App就可睇晒所有資料，仲有日文同英文兩種介面，唔怕唔識去。
平台：iPhone
下載費用：0.99美元
《駅之友Platinum》搭車必備
在日本問路都幾煩，試過問一個婆婆最近車站喺邊度，佢非常好人答咗我幾分鐘，但當中大半聽唔明。《駅之友Platinum》除收錄列車路線同車站檢索等內容之外，仲可以配合GPS定位功能搵出最近的車站，就算行行吓認唔到路都唔使閉翳。
《日本之駅M》冇轉錯車
日本鐵路非常發達，但一個車站可能有成十幾條線，唔熟路嘅遊客好有機會搭錯車。《日本之駅M》就列晒日本鐵路線同車站嘅名稱，仲有地圖輔助，使用方便。