「分勝負重要，定係同屋企人食飯重要？」計我話，入動漫節掃貨最重要，皆因今年本地廠商特別多，例如Enterbay為葉問及李小龍鑄碑立像，淨係睇佢兩師徒對決已夠晒噱頭；仲未計風雲、龍虎雙雄同火雲邪神，今屆簡直係土炮角色大混戰，且看葉師傅能否一個打十個！
Hot Toys繼續玩外國經典電影角色，今年就發售3款特別版Figure，分別係12吋Sarah Connor同Guardian Predator，以及1:4 Mark VI半胸像。當中以《未來戰士2》Sarah Connor最搞鬼，其實係由液晶體機械人T-1000假扮，因此除附送可貼於身上的磁石子彈孔外，還多送一個T-1000爆眼頭雕，畀玩家放到原裝T-1000 Figure上。另外，會場還會展出War Machine真人高雕像，《鐵甲》迷記緊朝聖！
繼去年絕世好劍大獲好評後，馬Sir今年再重鑄另一鎮山之寶雪飲狂刀，12吋版有紀念、限量及原色版選擇，配以精鑄神風盟Logo刻字刀座，天下迷必儲。另外，聶風半胸像亦首次現身，有原色版及限量40套的金屬版，而即使唔係風迷亦有原色步驚雲胸像，滿足兩幫Fans。入場記得買埋風雲6吋超可動Action Figure，各有13個關節，出排雲掌話咁易！
本地Figure名廠Enterbay出品一向貴精不貴多，蟄伏多年原來為炮製「全宇宙最好打」嘅葉問Figure，分類屬於1/6 Real Masterpiece系列，造型則參照第2集，因此有齊黑白兩套功夫衫。E記出品，頭雕當然超像真，但最教人驚喜係配件超齊，除必備木人樁地台及4對詠春手掌外，還有用來打金山找的雞毛掃，勁抵死！嫌葉問未夠經典，E記仲有70周年全球限量版李小龍全身像，以1:4比例重演《龍爭虎鬥》中招牌動作，傷痕血漬更參照當年化妝特技，將龍哥鋒芒重現人世！
邪神殺入動漫節！《龍虎門》裏的火雲邪神、東方無敵、蚩尤、韋陀及金羅漢再非紙上英雄，今年玉皇朝終於炮製第2彈極上首辦系列，將他們全部變成1:12 Figure。覺得兇猛過頭？仲有Q版石黑龍、火雲邪神同王風雷，由搪膠達人梁光明設計，Kawaii到爆！漫畫則有《天子傳奇七 三國驕皇》，黃生親征延續天子傳奇。
撰文︰陳志滔