Kinect實試喪跳跨欄挑戰劉翔

撰文：布偉倫 攝影：林資凱

距離5、6呎都玩到

Kinect係Xbox 360全新體感遊戲系統，靠附有RGB鏡頭、深度感應器同陣列式咪高峰三位一體的Kinect感應器連接Xbox 360，配合專用遊戲，就可以感受到唔需要手掣嘅體感玩法。好多人都問Kinect要玩到全身體感，所需空間係唔係好大？其實視乎遊戲而定，好似《Dance Central》離開Kinect感應器5~6呎就玩得；而《Kinect Sports》跨欄就要遠到8~9呎，如果行得太埋或者企歪咗嘅話，遊戲會提你「Move Back」或「Move Right」之類。

內置RGB鏡頭、深度感應器同陣列式咪高峰的Kinect感應器。

Kinect感應器可以直接插在新Xbox 360主機之上，舊主機就要靠轉插。

《Kinects Sports》跨欄攰

《Kinect Sports》正式版收錄6種個人或者隊際運動項目，包括足球、沙灘排球、保齡球、乒乓球、田徑同拳擊，而在動漫電玩節可供試玩嘅版本就只得跨欄同保齡球，另加歡呼打氣模式。保齡球玩法幾似真正碌齡，可用右手或左手在球道上拿取保齡球，遊戲會因應碌出保齡球的快慢去判別球速，而且細緻到感應埋手腕嘅旋轉，「落西」或打出飛碟球都得，真實度好高，不過運動量屬小兒科。

保齡球像真度高，可以打出旋轉球，惟欠缺真實保齡球嘅重量。	跨欄遊戲可以兩個人一齊玩，不過謹記要留意身邊同伴位置，否則好易火星撞地球。	Conduct the Crowd實情唔算係遊戲，只係畀你扮賽事中運動員揮吓手，引得全場觀眾歡呼過吓癮。

跨欄遊戲結合原地跑同原地跳兩種動作，而且原地跑需要提膝先感應到，否則會變成行路；而且仲要睇住賽道上的欄杆，當欄杆變黃時要準備跳躍，變綠就要起跳，唔係會撞欄，難度都幾高。小記玩過兩、三次，最快試過跑到19秒幾，想挑戰劉翔真係有排練。玩完後堅攰，在冷氣房內都流到一身汗，用嚟減肥一流。

扭動蛇腰都感動得到，其他體感平台做唔到。

跳舞水皮嘅玩家都可以在「Break it Down」入面熟習每個舞步。

類　　型：運動

開　　發：Microsoft Game Studios

推出日期：11月

《Dance Cenral》扭蛇腰

《Dance Central》開宗明義玩跳舞，不過唔似當年跳舞機要用跳舞氈，只需搵個大啲嘅空間就得。跳舞機主要練腳步，但《Dance Central》就舞動全身，可以感應到手部擺動以及拍手等動作外，連扭動蛇腰都可以感應埋。唔熟習舞步的話，每首歌均設有Tutorial「Break it Down」逐個Step教你跳，跳熟成首歌嘅舞步先至玩都得。《Dance Central》正式版會收錄90首歌曲及舞步，跳得叻仲可以開啟新舞衣同場地；而試玩版暫時只得6首歌，包括Lady Gaga《Poker Face》同Lipps Inc.經典歌曲《Funkytown》，有睇頭！

類　　型：跳舞

開　　發：Harmonix

推出日期：冬季

新Game動漫電玩節試玩

除Kinect會在動漫電玩節登場外，Xbox 360另有兩款未曝光新Game同場展出，輪唔到籌玩Kinect都可以打機止癮。

《F1 2010》

今屆改咗例嘅F1賽車鬥到如火如荼，想感受現場氣氛可以試玩收錄埋韓國Grand Prix賽道的《F1 2010》，話明將目標放在明年嘅「車神」舒密加當然亦會在遊戲內現身。

類　　型：賽車

開　　發：

Codemasters

推出日期：待定

《Naruto終極風暴2》

延續自兩年前的《Naruto終極風暴》動畫風格式格鬥，今集更收錄超過40個角色；每個角色都具備可透過改變形態去提升能力的「覺醒模式」及更華麗的忍術招式，而且對戰場地亦會因遭受破壞而改變。

類　　型：格鬥

開　　發：

Namco Bandai Games

推出日期：10月