雖然遊戲玩家貪新忘舊，但睇睇12年前推出、總銷量已超過1,100萬套的PC遊戲《StarCraft》，至今仍然大把人玩緊，仲係現時國際性打機比賽的指定遊戲，地位崇高。所以開發公司Blizzard唔只一擲千金，直頭用上1億美元預算去開發第二集《StarCraft Ⅱ: Wings of Liberty》，打造更精采的神族、人類同蟲族間之大戰。
《StarCraft Ⅱ》原本舊年推出，但結果搞到今年2月先開始公測，下星期正式發售，不過既屬PC遊戲嘅大作，機迷都唔怕等多一年半載。第二集故事延續98年資料片《StarCraft: Brood War》，講述4年後的世界，多位第一集主角會再次現身。故事圍繞叛軍領袖Jim Raynor嘅奮戰，在29個單人任務中揀選自己的路向；除玩到唔少原本的戰場外，另外亦有新加地圖，夠晒新鮮感！
第二集玩法同《StarCraft》冇分別，靠搶資源去建造各種建築物、軍隊同升級，然後集合成軍去殲滅對手，不過遊戲節奏更快，在各方面的平衡亦做得更好。《StarCraft Ⅱ》可用到神族（Protos）、人類（Terran）及蟲族（Zerg）去戰鬥，而以玩過測試版的玩家意見，人類實力最弱，唔夠神族及蟲族打。由於第二集故事不同，所以兵種亦跟第一集有顯著分別，就算同一類兵種都被賦予唔同技能，如神族狂戰士（Zealot）一出場已經係快速兵種，可以直衝向敵方的遠程兵種，唔使等升級。
既花咁大筆資金去開發，新一集畫面當然用上全新3D圖像引擎處理，場面表現比第一集有好大改進。在處理大規模戰爭場面時十分出色，兩族互片更能顯示到出色的光影效果。正如之前測試，《StarCraft Ⅱ》可透過Battle.net配對機制去搵對戰玩家，但要留意英文版同中文版本遊戲會連上不同Server去玩，中文玩家主要來自中、港、台，而英文版就可以挑戰全世界《SC》高手，請睇對手而選擇遊戲版本。
類型：即時戰略
開發：Blizzard
平台：PC
推出日期：7月27日
售價：$539（英文版）
查詢電話：2418 8896
撰文：布偉倫