7月中係遊戲界淡季，大作未有咁快出籠，但早兩日返貨的PSP遊戲《Last Ranker》都算係矚目之作。故事講主角要不斷戰鬥以求升級做到最高權力的七騎士成員，過癮之處在於即時戰鬥中可以做出極多元化的攻擊技能，運用到唔同戰術的同時亦能夠組合武器出擊，以PSP遊戲計都算唔話得！
《Last Ranker》在日本方面受到高度關注唔係冇道理，睇番遊戲的製作班底，可以話係「豪華級」，包括有《逆轉裁判》松川美苗做製作人，劇本就交由《Kingdom Hearts》、《FF7》、《FF8》、《FF10》的野島一成負責，《Kingdom Hearts》下村陽子主理遊戲音樂，而角色設計就由《Devil May Cry 4》、《洛克人X系列》的吉川達哉操刀，RPG遊戲之中最重要的項目都有保證，畀到玩家好大信心，難怪Capcom咁落力宣傳呢款遊戲啦。
故事背景講全世界戰士都隸屬一個名為巴薩塔的組織，組織當中有好明顯的階級主義，階級愈高權力愈大。而位處最高位的「七騎士」剛好有個空位，各方戰士便起來爭奪這個最高權力位置。遊戲中大家要控制主角Zig去打生打死，打倒其他戰士取得分數提升排名，玩法有啲似Online格鬥遊戲；不過呢個排名唔只係虛銜，遊戲會因應戰鬥的勝負而產生不同的支線故事，而且想爆機就要成為排名第一的戰士。
《Last Ranker》採用即時戰鬥玩法，行行吓遇到其他戰士就會埋牙，要把握時機攻擊同防守，似玩Action遊戲。好在主角Zig有唔少特別技能，仲曉得用唔同武器輔助，譬如可以古代「二刀流」攻擊敵人，亦可使出亂舞必殺技重創對手，又或戴上「虎爪」使出吞噬拳令對手陷入崩潰狀態，甚至用槍遠距離攻擊，招式非常多元化。戰鬥途中或會執到可發動必殺技的道具，大家在如棋盤上的Attack Style設定入面，可以調校出唔同必殺技的按鈕，或者利用道具組合出新招式，設計幾過癮，大把新招等你發掘。
類型：RPG
開發：Image Epoch/Capcom
平台：PSP
推出日期：已推出
售價：$298
查詢電話：2359 7998
撰文：布偉倫