玩Wet Game泡製快感

由聽日起，海洋公園夏水禮將延長開放時間，可以由早上9點半玩到夜晚8點鐘，畀大家盡玩園內各項消暑遊戲，Wet完再Wet，跟炎夏決一「水」戰！

4大戰區水鬥水
1.超長滑水梯

鍾意刺激的話，歡迎挑戰夏日瘋狂滑水梯（Summer Super Slides）！

場內有3條滑梯，包括一條高11米、長54米的「極速摩天滑水梯」，聲稱係全球最長，夠唔夠膽挑戰，絕對考你膽量！小朋友未夠高？可以挑戰高7米、長28米的輕量級「沖天滑水梯」。再年幼一點的小豆丁，則可於嬉水天地玩迷你版「樂天滑水梯」。

放大圖片	極速摩天滑水梯，你夠唔夠膽挑戰呢？	小朋友可選擇輕量級沖天滑水梯，一樣咁刺激！

2.槍戰水世界

克服了離心力的挑戰，係時候考吓反應、策略，進入刺激的槍戰水世界（Alien Water Battle）！入場前，每人要戴上眼罩、佩備水槍，先聽從司令分析，方可進入超過10,000平方呎的戰場中作戰，挑戰遍布四周的水彈機關，狙擊神出鬼沒的水怪，一不留神，隨時慘變落湯雞！

跟隊友合力過關斬將，方可將水怪逐一擊退。

來到重型射水區，可用特備水槍激射目標，考驗眼界。

3.水彈發射站

射低水怪，可繼續進佔水彈區，挑戰自己的眼界。只要將水彈放入膠桶內，並瞄準敵方發射，即可攻到對方措手不及，成身濕晒！

4.嬉水天地

非常Colorful的玩樂區，大小朋友可手持射水器互相「攻擊」。經過一輪大混戰，仍能保持不濕身，只有靠奇迹！

七彩繽紛的設施，為小朋友度身訂造！	場內有機械水怪同你Say Hi，一於影張靚相先。	迷你版「樂天滑水梯」設於嬉水天地內，是小朋友的專用滑梯。

泡泡池 開Party

激戰過後，大小朋友可齊齊歎吓泡泡浴！園內設有大型泡泡池，配襯色彩繽紛的派對燈效，一邊聽住現場播放的流行音樂，一邊跳舞玩泡泡，比起一般舞池更好玩！

餘興節目 睇表演掃精品

除了玩水戰，園內仲有得睇表演！一眾歐美跳水高手將齊集海濱樂園，參演「高台飛魚大匯演」，從80呎跳台一躍而下，瞬間完成火燄跳水、空中彈跳、花式旋轉、凌空翻騰等高難度動作。另一邊廂，大樹灣廣場將上演「濕身鼓陣」，別錯過一班性感Dancer為大家濕身呈獻的消暑勁舞！

表演時間：11:30am、1:30pm、2:45pm、4:15pm、6:00pm

場內有不少得意精品，女孩子又可以盡情Shopping喇！

放大圖片

海洋公園夏水禮

日期：即日至8月31日

收費：成人$250、小童（3至11歲）$125

查詢電話：3923 2323

撰文：楊芷穎

攝影：林資凱

模特兒：S、Betty（Komsomolsk）、Maki、Gaby