新登場 水墊瞓身玩

暑假流流長，冇理由日日躲入冷氣房，向悶熱嘅天氣扯白旗。係時候換上一身水着，撲向泳池、海灘，展開消暑大作戰！南丫島西沙水上活動中心一向是玩水好去處，最近中心更引入一張水上浮墊，畀大家瞓喺涼浸浸嘅水面，盡情享受日光浴，向酷熱嘅驕陽示威！

負重千五磅點玩都得

新登場嘅水上浮墊，其實係由美國引入嘅WaterMat，以聚丙烯海綿製成，浮力驚人，經過測試，可以承受1,500磅重量，閒閒哋可瞓上10個人都唔會沉，最重要係夠安全，唔怕撞瘀、唔會割手，大家可以喺墊上曬太陽、打觔斗、跑跑跳跳，仲可以玩水上摔角，鬥快推人落水……真係點玩都得！

玩法２：曬太陽 側身瞓、橫瞓都仲有大把吉位！

玩法３：水上飄 咪以為好Easy，隨時跌落水！

試玩報告

好玩指數：★★★★（5粒星為最高）

危險指數：★

收費：會員$10、非會員$30

點止水墊咁簡單！

除了WaterMat，西沙水上活動中心仲有十幾款水上玩意，好多款都非常合家歡，如水上三輪車、3人獨木舟，以及啱小朋友玩嘅碰碰船同青蛙仔獨木板，每項玩意嘅收費各有不同，加入成為會員，可以$118優惠價任玩兩小時（部分水上活動不適用）。

電動浮板 只要一拉摩打，浮板即時向前衝，快到似支箭！$55/30分鐘	碰碰船 Size有大有細，最啱一家大細齊齊玩！（大船）$55、（小船）$35/30分鐘	青蛙仔獨木板 Size小巧，可讓小朋友學划艇，練手力。$35/30分鐘
水上三輪車 $55/30分鐘	開放式2+1獨木舟 $125/60分鐘	水上彈床（暫時只供團體使用。）

有房出租

玩完水，曬完太陽，附近有一間星浪餐廳（The Bay），可以Hea吓，其Tea Set有熱狗和漢堡包可供應擇，漢堡包牛肉成寸厚，正！此外，餐廳有客房出租，基本設施齊備，仲有一個靚露台，喺度過夜數星星，好浪漫呢！

雙人房收費：（平日）$880（假日）$980（包二人晚餐一份）

西沙水上活動中心

地址：南丫島模達灣7號

收費：2小時任玩套餐 $118（會員）、$130（非會員）

查詢：2792 8307

點去模達灣？

可於香港仔碼頭（香港仔海濱公園內「珍寶海鮮舫」接駁船碼頭隔鄰）乘搭街渡，船程約23分鐘。平日每60至90分鐘一班，收費$9.2；星期日及公眾假期每45至60分鐘一班，收費$13.8。

查詢網址：www.ferry.com.hk（全記渡）

撰文：梁穎恒

攝影：陳富權

模特兒：Perry、Ada（Komsomolsk）、Charlott（Talent 100）