瘦白一Take過N-04B靚晒！

在明星全力催谷下，近期女士茶餘飯後話題都圍繞打Botox，不過其效果不長久，隔幾個月打一次唔係辦法。要長時間Keep住靚，唔使靠打針，買部手機就搞掂！新出日本水貨機DoCoMo N-04B就有「美顏」、「瘦臉」兩大拍攝模式，立即變白又得，立即變瘦亦得，得咗！

屏幕後翻後，機身會變成DC模樣，配合3.3吋巨芒，取景好過唔少相機仔。

瘦面快過打Botox

男與女天生就唔公平，男人有條「火車軌」叫男人味，女性多條細小眼紋，就要狂執相補救。N-04B正正為眾女士而生，內置「美顏」、「瘦臉」兩大Beauty Mode，各有強、中、弱3個程度調校，前者自動修正被攝者皮膚狀態，加強透白兼去紋去瘡；後者則令臉頰變瘦變尖，一Take就令包包臉即時消失，快過打針！

售價︰$3,880

「美顏」、「瘦臉」合併或分開使用都得。

同時開啟兩個Beauty Mode，Model不但皮膚變滑變細，連下巴都尖到插死人，變靚速度仲快過「還原靚靚拳」！

同時開啟兩個Beauty Mode，Model不但皮膚變滑變細，連下巴都尖到插死人，變靚速度仲快過「還原靚靚拳」！

快門極速開動

貴為今夏日本最新拍攝手機，N-04B功能當然不止於此，還提供28mm廣角、防手震、觸控對焦、SCN場景模式及720p高清拍片。另外，機背設有LED補光燈，配合ISO 12,800超高感光度，幾黑影相都唔怕朦查查！而為滿足Snapshot需要，它特別把快門啟動速度提升至0.6秒，間隔攝影亦快至1.4秒，毋須回氣就影到下一張，唔怕錯失精彩時刻。

1,220萬像素鏡頭、LED補光燈及喇叭都設於機背，並採用CMOS感光元件。

機側設有Key Lock及音量掣，影相時會分別變成快門及變焦掣，一物二用。

突破上網枷鎖

講到機身設計，日系機一向樣靚身材正，N-04B都唔例外，不但採用經典旋屏摺疊設計，可座枱擺放；厚度仲比前代N-02B減少6.1mm，加上瘦身了12g，外觀望落更Slim。手機罕有地支援Wi-Fi無線上網，以往日系機因為SIM Lock關係，就算有瀏覽器都上唔到網，但如今卻睇到HTML網頁兼讀到Flash，就算睇ontv短片都冇問題。惟留意它還有「圈外」問題，未能兼容3仔SIM卡！