上一集《Crackdown》故事講未來特警在近未來世界打黑幫，坊間同外地遊戲網站嘅評價都幾好。3年後第二集《Crackdown 2》，主角仍然留守Pacific City，除要打捲土重來嘅黑幫The Cell外，仲要打埋無啦啦變成喪屍嘅市民，基本上成街都係敵人，要用盡各種武力手段解決佢哋，喪過玩《GTA》！
《Crackdown 2》故事同上集一樣發生在虛擬嘅Pacific City，不過時間上就設定在第一集之後10年，黑幫The Cell又再搞搞震，要應付呢班武裝分子已經唔容易，再加上今集市民都受到病毒入侵，大部分變成喪屍，天一暗就衝晒出街搞事，對付佢哋有排煩。遊戲仍然延續美式漫畫風格設計，雖然話成街喪屍，但境況都唔算太恐怖，而且對住佢哋開火、近距離拳打腳踢又或者開車輾過都得，要幾殘忍有幾殘忍！
Pacific City設計得比上集仔細，同時遊戲在畫面的流暢度同爆破效果都好有水準。由於主角係具有超能力嘅未來特警，動作可以更誇張，一跳就跳上幾層樓咁高，又或從十幾樓跳落街都絲毫無損，亦可雙手捧起大貨車掟向敵人。今集保留5種能力值屬性，執起散落在地圖上的光球就可以提升，譬如提升跳躍能力可以跳得更高；升級射擊同爆破能力會提升準繩度及殺傷能力；提升駕駛能力可以揸到更重型車輛；如想舉起更重物件攻擊嘅話，就要提升體力。玩家可以作出針對性育成，訓練出最強嘅未來特警。
遊戲設有唔少主線同支線任務畀大家玩，又或者可以只係打黑幫、打喪屍，自由度極大，甚至乎搶架跑車兜風撞喪屍都可以。《Crackdown 2》採用英文配音，行貨遊戲就為機迷加入中文字幕，等大家更能了解故事，抵讚。這類以射擊行先嘅遊戲，一個人玩嘅趣味唔太高，所以遊戲提供多達16人連線嘅對戰模式，再加多個4人合作模式，透過Xbox Live連線一齊殺清黑幫同喪屍。玩法雖然同單機模式好相似，但可以齊齊升呢，爽。
類 型：動作
開 發：Realtime Worlds
平 台：Xbox 360
推出日期：已推出
售 價：$309
查詢電話：2725 3338
撰文：布偉倫