上水農莊　阿拉飛氈　驚足5秒

周日玩樂目的地，你揀羅湖定上水？唔使問梗係前者多。北上得多也會悶，不妨做番次本地周末型人，出發到上水假日農場摘吓新鮮瓜果。這裏除了田園氣息滿溢，又有一連串DIY活動，如焗麵包及紮稻草人。整完餅又可以玩盡Old School懷舊玩意，如人力車、踩水車及「阿拉飛氈」。刺激快感原來唔使靠機動遊戲，坐麻包袋當飛氈一樣High！

即焗即食　蛇瓜當劍

時下農莊都興玩DIY手作仔，假日農場都不例外，除了有拉麵及竹昇麵DIY，訪客還可以焗麵包。只要到訪前預訂，農莊便會預備好發酵麵糰，屆時便可隨心所欲創作一番，將麵糰放進焗爐十多分鐘後，一個形狀獨一無二的麵包便新鮮出爐！自問兒時勞作頂瓜瓜，不妨玩下田園手作仔，整番個迷你稻草人，用來布置家居必增添不少田園風味。

農莊種植了不少瓜果，除了現時當造的「糯米糍」荔枝及茄子，還有黃皮、青提子、木瓜、葫蘆瓜、熱情果及市面少見的蛇瓜。Pinky見蛇瓜似蛇又似劍，即時高舉當木棍襲擊Travis，嚇得這位大男孩跑入綠色迷宮暫避風頭！迷宮附近種滿食桌常見的植物及香草，如崩大碗、百里香及蘆薈，叫人增進草本知識。

踩水車可以運水兼當做Gym。

大熱天時最啱玩涼快的飛天索「小吊籃」。

坐人力車餵牛　同兔仔拔河

新界牛買少見少，Travis與Pinky得悉可以餵牛牛，立即執起鮮草，親手餵飼平時只作觀賞，而不用下田幹活的幸福牛女。從未親手餵過牛的Pinky愈餵愈興奮，好抵得諗嘅Travis更拉動人力車，載住Pinky邊坐邊餵。二人似乎餵動物餵上癮，餵完牛牛及大肥豬，又買了些葫蘿蔔條餵葵鼠及兔仔。負責人提醒我們要同小動物玩「拔河」先過癮，大家緊握葫蘿蔔條慢慢餵飼，與小動物進行拉鋸戰，眼見二人咬牙切齒與兔仔鬥牙力，令人忍俊不禁。

兒時勞作課攞慣甲，自製稻草人手作仔點難到你。

自搓麵糰焗麵包，十多分鐘有得食。

原來用葫蘿蔔條餵動物，是牙骹拉鋸戰！

小吊籃　愈玩愈興奮

成立約十年的假日農場，唔只農莊咁簡單，進園不久已有兩條滑梯，讓你感受離心力醒醒神！初時看見這條大滑梯，並沒有聯想起恐懼與刺激感，當陽光男孩Travis拿起麻包袋，率先試玩，然後5秒間從上尖叫滑下，大家才對這條名為「阿拉飛氈」的玩意兒刮目相看。文靜女模Pinky也衝破恐懼試玩，驚青至全程閉眼瞓直滑下，似乎刺激度更勝水上樂園。玩完飛氈壯了膽，二人全程投入試玩園內全靠人力推動的刺激活動，包括坐定定有得玩的飛天索「小吊籃」、突然升高降低的「震盪高搖板」及跑草馬，似乎兩位80後不但不抗拒這些Old School玩意，仲愈玩愈興奮。