前傳柯柏文戰鬥Pose企得穩

《變形金剛》由動畫打到出電影，再由銀幕轉戰遊戲，最近就以博狂兩派的故鄉斯比頓星，推出「老變前傳」《Transformers：War for Cyberton》遊戲，講番變形金剛未落地球前的連場大戰。唔單只柯柏文、大黃蜂等角色全部變晒科幻Look，連孩之寶都乘勢加推Deluxe版斯比頓星形態變形金剛玩具，身為老變粉絲又怎能錯過？

斯比頓星柯柏文關節相當靈活，跪喺度擺甫士都冇問題。
售價：$139.9

初代頭部科幻新Look

斯比頓星系列玩具以柯柏文和大黃蜂兩位老朋友打頭陣，身處外太空當然冇貨櫃車或甲蟲車這些地球交通工具，所以變身後成為科幻戰車Look，流線外形附有炮台符合戰爭發展，不過主角頭部和色調都沿用初代設計，好似柯柏文用紅藍、大黃蜂襯鮮黃，讓玩家一睇就認得出。雖然玩上手膠感重了點，但手腳關節卻意外地靈活，甚至能超過90度屈曲，擺出戰鬥甫士都企得穩，百幾元貨仔算交足功課。

博狂大戰遊戲撈玩具

近來乜都興玩前傳，連變形金剛遊戲都再出《Transformers：War for Cyberton》前傳，讓玩家化身博、狂兩派對戰，而在遊戲中玩家除了可變形成戰車或戰機外，更可選擇Leader、Soldier、Scout和Scientist兵種，好似柯柏文屬Leader增強隊友能力、大黃牌屬Scout玩游擊偷襲，網上10人互射對戰。對比番玩具造型確係有九成接近，如果Logo和心口關節識得發光就更完美，據知下一波玩具將會是麥加登和音波，預計8月抵港。

Deluxe版大黃蜂大約一隻手掌咁高，但前臂仍可伸出激光劍。<br>售價：$139.9

Deluxe版大黃蜂大約一隻手掌咁高，但前臂仍可伸出激光劍。
售價：$139.9

變身戰車的大黃蜂（左）及柯柏文（右），設計成流線外形，充滿科幻感。

武裝大黃蜂、領袖星星叫

變形金剛玩具又點少得電影版嗰份，今次除了在Leader版首度曝光的奸角星星叫，化身成像真度極高的F22迷彩戰鬥機，還有加大碼Battle Ops大黃蜂，可說是歷來最精細和最接近電影造型的武裝設計，無論是手臂的雷射炮或肩上的機槍都識得發聲和發光，更可戴上電影出現過的戰鬥面罩，比之前出過的Deluxe和Leader版更有睇頭。